Chanmari FC coach thar Dipankur Sharma

7th January, 2025

I League 2 khel tur Chanmari FC chuan coach atan Dipankur Sharma an la lut a, nimin zing khan RG Stadium-ah training a kaihruai nghal. Dipankur chuan Mizo club-ah beiseina sang tak a neih thu Vanglaini a hrilh.

Chanmari FC hian Lalsangzuala Hmar hoin season bul an ṭan a, I League 3-ah khingpui hneh vekin group stage an paltlang a, final round-ah pahnihna ni lehin I League 2 khel turin an tling. Amaherawhchu, I League 2-ah AFC A Licence coach a ngaih avangin Chanmariin AFC B Licence nei Sanga an chhawr zui ta lo a, AFC A Licence nei Dipankar an la lut.

A sulhnu chu

Dipankar hian football a luhchilh hmain kum 2013 khan Symbiosis Law School, Pune aṭangin Bachelor of Law leh Bachelor of Business Administration a zo. Kum 2018 khan MBP School of Coaches aṭangin Masters in High Performance a zo leh bawk.

I League 2-ah 2022-23 season khan Dipankar hian Corbett FC a enkawl a, season liam ta khan BDFA Super division-ah Bengaluru club Kodagu FC a enkawl.

Hemi hma hian Reliance Foundation Young Champs-ah head coach hna a thawk tawh a, FutAcademy, Mexico-ah head coach hna thawk tawhin World1 Football Schools leh Bhaichung Bhutia Football Schools-ah technical director hna a chelh tawh bawk.

Chanmari dahsangtu

Chanmari FC coach thar Dipankar chuan, "I League 3-ah khan Chanmari FC khel kha ka thlir a, an khel nung ṭha tak kha hmuhnawm ka tih bakah ka khelh duh dan nen a inang. Training hmasa berah pawh ka beisei ang ka hmu a, ka lawm hle," tiin Vanglaini a hrilh.

I League 2-ah hian team pakua an inel dawn a; Chanmari bakah Bengaluru United, Diamond Harbour, Klasa, Neroca, Sat, Sporting Goa, Trau leh United te an inel dawn. Vawi hnih ṭheuh an inkhelh chhuah hnuah I League khel turin a sang pahnih an tling dawn a, a hniam pahnih an relegate thung ang.

Dipankar chuan, "I League khelh ngei kan tum a, mahse kan hmalam hun thui tak kan thlir thei lo. Uluk takin training kan nei ang a, match khat zel atan kan inbuatsaih ang," tiin Vanglaini a hrilh a, player bakah assistant coach Rochhingpuia a fak bawk.

I League 2 hi 25 January - 13 April 2025 chhunga khelh tura ruahman a ni.