Real hnenah hralh rawh u!

Trent Alexander-Arnold-a'n nipui transfer-ah Liverpool-a a contract a hmang zo tawh dawn a, Real Madrid nen sawizawm mek a ni - Reds-in contract thar zawrh mah se, Santiago Bernabeu-a khelh a duh zawk niin an sawi.

English fullback hi a hma hun chiang lo hian a tibuai nia sawi a awm a, United laka a khelh dan chu a hrilhfiahtu a ni. United goal hmasa ber chu a pass sual aṭanga lut a ni a, an goal hnihna pawh ama lam pawp aṭanga lut tho a ni.

United lakah Arnold a khel chhe takzet a, Liverpool-in maktaduai tel hlawha cham tura an thlem, Real-in an awh ngawih ngawih defender nih a inhmeh lo a ni ber mai.

Inkhelh zawhah United legend Roy Keane chuan, "Trent hi Real Madrid-a kal tur anga sawi a awm a, a khelh dan en chuan Tranmere Rovers-a kal tur ni zawk awm tak a ni! Kha aia ṭha khan a ti tur a ni," a ti!

League Two club Tranmere Rovers lamin Keane hi an chhang vat a, social media lamah an fullback Cameron Norman thlalak tarlangin, "Roy, Trent hi Tranmere-ah a rawn kal ang maw? Ni lo e, kan lawm e," an ti a, an defender Norman an duh zawk!

Liverpool fans tam takin Arnold hi Real lama a rilru awm tawhah an ngai a, amah ang thoa contract hmang zo tur Virgil van Dijk leh Mohamed Salah te pawh an khelh ṭhat em em laia a khel chhia hi an hrethiam lo.

Social media lamah English fullback hian sawisel a tawk zui a, Liverpool fans ṭhenkhat chuan tun season-a chhawr tawh loh an duh hial - "Real hnenah kaltir tawh ru," an ti!

Liverpool boss Arne Slot erawhin a player a chhan a, Dutch coach chuan, "Portugal tana bul ṭan ziah pahnih Bruno Fernandes leh Diogo Dalot a hmachhawn a ngai a, chu zawk chu a buaina a ni," a ti a, Liverpool hian Nilaini zanah League Cup semifinal first leg khel turin Tottenham Hotspur an lenchilh zui ang.