British heavyweight boxer rothap Anthony Joshua chuan a hneh tawh hnu Dillian Whyte a tawng nawn leh dawn a, August 12 khian London khawpuia O2 Arena-ah an inhnek dawn.

December 2015 khan boxer pahnih hi an lo intawng tawh a, he inhnek boruak 'hot' takah hian Joshua hian round sarihna lekah Whyte hi a knockout - WBC International leh Commonwealth heavyweight title a kawl lai a humhim a, British heavyweight title a la bawk.

Whyte a hneh hnuah Olympic gold medallist Joshua hian boxing khawvel thunun chhoin, IBF, WBA, IBO leh WBO heavyweight title a kawl chho a, mahse, June 2019 khan Andy Ruiz Jr. lakah rin loh takin WBA (Super), IBF, WBO leh IBO heavyweight title a kawl lai chu a hloh.

Joshua hian Ruiz Jr. hi hneh letin, December 2019 khan a title hloh tawhte a nei let a, December 2020 khan Kubrat Pulev lakah a humhim leh bawk.

Mahse, September 2021 khan Oleksandr Usyk ngam loin Joshua hian a title kawlte hi a hloh vek a, August 2022-ah rematch nei mah se split decision hmangin a tlawm nawn.

Joshua hian Usyk a hneh loh nawn hnuah April 2023 khan Jermaine Franklin chu unanimous decision (UD) hmangin a hneh a, kuminah a vawi hnih nan a inhnek leh dawn ta.

Kum 33 mi ni ve tawh boxer chuan, "Kuminah hian a tam thei ang inhnek ka duh tihah ka chiang. August 12 kan ruat a, inhnek turin ka inpeih dawn - ka nghakhlel tawh takzet a ni," a ti a, hnehna chan ngei a tum.

Whyte leh Joshua hi amateur an nih lai pawhin an lo intawng tawh a, kum 2009 khan Whyte hian hnehna a chang. Mahse, professional an nih hnuah Joshua a chak ve leh thung a, Whyte-a'n phuba lakna remchang a nei leh dawn.

Whyte chuan, "August 12 hi nghakhlel takin ka thlir a, London khawpuia O2-ah indona ka hmachhawn dawn a ni. Kan pahnih intawnna hi 1-1 a inhnehtawk mek a ni a, tuna kan inhnek tur hi a chungnung zawk zawnna a ni ang," a ti.

Kum 35 mi Whyte hian professional boxing-ah vawi 32 fight hmachhawn tawhin, vawi 29 hnehna a chang a, vawi thum a tlawm - vawi 19 chu a khingpui a knockout thei a, a nep lo hle.

Whyte hian April 2022 khan Tyson Fury chu a career-a world title a fight vawi khatna ni turin a hmachhawn a, mahse, round rukna lekah technical knockout hmangin a chak. Joshua nena an inanna chu an match hnuhnung berah Jermaine Franklin an hneh ve ve.

Joshua hian vawi 28 fight hmachhawn tawhin vawi 25 hnehna a chang a, vawi thuma tlawm tawh - vawi 22 ngawt a khingpui a knockout thei a, ruahman dan chuan December hian Saudi Arabia-ah world champion hlui Deontay Wilder nen inhnek tur an ni.

British boxer Joshua hian American boxer hnek na zet mai Wilder hmachhawn hmaa inhnek hmachhawn leh phawt a duh a, Whyte nen an inrem - Wilder hmachhawn zuam lo khawpin a tlawm ve thei tih erawh theihnghilh loh a ṭha.

Joshua leh Whyte-a aiawhte hian hun engemawchen chu indawrna hi an lo kalpui tawh a, Whyte-a'n rematch clause awm chu thaibo a duh anga Joshua leh a promoter Eddie Hearn ten thaibo an rem tih hnuah an inrem thei hram.

Hearn chuan, "He fight ropui tak a thleng tur hi awih har ka ti zawk hial a, fighter pahnih hi an hmuhnawm khawp ang. Boxer pahnih inkara inhalna hi a thûk êm êm a, a tlawm zawk nih an tum dawn lo ve ve.

"Boxer pahnih tan tlawm thiang lo inhnekna tia chhal theih ve ve a ni a, ennawm ropui en turin lo inring rawh u," a ti a, British heavyweight boxer pahnih inhnek tur chu a sawi 'hot' thiam hle.