Chak pali an awm nghal

Aizawl DFA buatsaih Second Division Playoff second round chu nimin khan Lammualah khelh ṭan a ni a, match pali inkhelah chak zawk an awm vek. Group A-ah Aizawl South FA leh Tuithiang FC te an chak a, group B-ah Armed Veng leh Mission Vengthlang te an chak ve bawk.

Group pahnih aṭang hian pahnih ve ve Second Division khel turin an tling dawn a, match khatnaa chakte hi an dinhmun a ṭha. Group B-ah Armed Veng leh Mission Vengthlang ten Thawhṭanni hian chak lo Ramhlun FC leh Orison FC te an hmachhawn dawn a, an chak ve ve a nih chuan an tling nghal ve ve ang. Chutihrualin Ramhlun FC emaw Orison FC emaw an chak a nih chuan inelna a nung sawt ang.

Group A-ah erawh Thawhṭanni hian match hmasa bera chak Aizawl South FA leh Tuithiang FC te a vawi hnihnaah an inkhel dawn a, inkhel pawimawh bik a ni ang. Ramhlun Vengthar leh Reuben FC tan pawh beiseina tur sang tak a la awm bawk.