Koch-a'n Frankfurt a zawm

Premier League aṭangin Leeds United an relegate a, Germany international defender Robin Koch chuan loan hmangin Bundesliga club Eintracht Frankfurt a zawm.

Kum 26 mi Koch hian kum 2020 khan Freiburg aṭangin Leeds a zawm a, English club tan hian match 77 a khel tawh. Leeds-ah hian season khat chiah contract a neih tawh avangin loan a hman zawn hian Koch hian free transfer-in a club duh a zawm thei ang.

Koch chuan, "Leeds tana season thum ka khelh khan tawnhriat ka neih belh a, khawvel league harsa bera ka khelh zarah football ang chauh ni loin nitin nunah pawh ka puitlin phah hle. Bundesliga-ah ka theihna hi fiah ka duh," tiin a sawi.

Leeds hian Championship an khelh dawn avangin an budget tih hniam a ṭul a, player hlawh tam an chhuah a ṭul. Whites hian Koch hi an chhuahtir a ni ngawt lo a, loan fee an la bawk ang.

Season liam ta khan Leeds-in Jesse Marsch leh Javi Gracia te an ban a, season tawpa an lakluh Sam Allardyce-a'n a chhan thei ta bik lo. July thla tir khan Daniel Farke an lalut a, German manager hian kum li daih contract a ziak.