Mercedes laka rinna nghattu Hamilton

Lewis Hamilton chuan tun dinhmunah Mercedes nen an duhthusam angin che thei lo mah se, hun rei tak chhung a lo hlawhtlin pui tawh team hi a la ring tawk a, an lakah rinna 100% a la nghat tih a sawi chhuak.

July 9, Pathianni zan dar 7:30 hian Formula 1 British Grand Prix an tlan dawn - Britain ram chuam infiamna an ngainat tak zinga mi an thleng leh dawn a ni a, tennis inelna lian Wimbledon khelh lai a nih bawk avangin infiamna ngaina tute tan kar tawp nuam tak a ni ang.

Mercedes driver Hamitlon hian F1 title pasarih ngawt a la tawh a, kum 2021 thleng kha chuan season tin intlansiak vawi khatah tal hnehna a chang ziah. Mahse, season hmasa khan chak ni hmel hmu miah loin hun a hmang tluan.

Tun season inelna neih laiah pawh a la chak miah lo, tun kara tawpa an tlanna tur Silverstone tlankawng hi atana hmun ṭha a ni a, tualchhung tlangval a nih avangin ṭantu pawh a nei ṭha leh ngei dawn.

Hamilton hian Mercedes tan tun season tawp thleng bak contract a nei tawh lo, engtin nge a awm zel dawn tih hriat a la ni lo. Hamilton chuan, "Kan tum ram tak thleng turin hun kan mamawh a, a nghah pawh kan nghak rei ve ta hle.

"A ṭha ber ni turin kan tho chhuak leh ngei ang tih hi ka beisei tlat a, chumi tur chuan Mercedes hian theihna kan nei a ni," a ti a, team boss Toto Wolff nena an inbiakna pawhin rah ṭha a chhuah dawn niin a sawi bawk.

British GP hian hlut a hlawh ṭhin. Zirtawpni leh Inrinniah tlan chhina an nei a, intlansiak tak chu Pathianniah a ni ṭhin thung, ni thum chhung hian a hmunah mipui 480,000 vel bawr an kalkhawm leh tura ngaih a ni.

An rama intlansiak tur ni mah se Hamilton tan hnehna chan chu thil awlsam a ni ngawt dawn lo. Tun season intlansiak an neih tawh hoah Red Bull driver pahnih Max Verstappen leh Sergio Perez te chauhin hnehna an la chang.