Chelsea plan-ah ka tel lo - Mount

Nimin khan Manchester United chuan season thar atana training an ṭan a, Chelsea aṭanga pound maktuduai 55-a Old Trafford zawmtu Mason Mount pawh a tel.

Mount chuan, "Thla engemaw zat liam ta khan Chelsea hmachhawpah hian ka tel lo tih ka hria a, Man United an rawn lan khan thutlukna ka siam fel nghal," tiin kum 18 a awm tawhna club a chhuahsan chhan a sawi.

Man United training-na hmasa berah hian Argentina defender Lisandro Martinez pawh inhliam vanga season liam ta tawp lam a khelh theih loh hnuin training-naah hian a tel. Nipui bazara chhuak tura sawi Donny van de Beek pawh a dam tawh a, training-naah a tel bawk.

First team zingah Fred, Antony, Raphael Varane, Aaron Wan-Bissaka, Brandon Williams, Anthony Martial leh Jadon Sancho te an tel nghal vek.

Goalkeeper David de Gea contract a zo a, goalkeeper dang Tom Heaton leh Dean Henderson te an tel thung. Loan aṭanga rawn let zingah Amad (Sunderland), Alvaro Fernandez (Preston North End), Will Fish (Hibernian), Hannibal (Birmingham City), Matej Kovar (Sparta Prague), Charlie Savage (Forest Green Rovers) leh Shola Shoretire (Bolton Wanderers) ten training an zawm bawk.