Real-in rawlthar duhawm an lalut

Spanish club Real Madrid chuan Turkish rawlthar duhawm Arda Guler chu Fenerbahce aṭangin an lalut a, kum ruk chhung atan contract an ziahpui–kum 18 mi playmaker man hi euro maktaduai 30 thlenga sang chho thei tur a ni.

'Turkish Messi' tia hminglem an pek Guler hi Barcelona pawhin lakluh an duh a, mahse, a hminglem an phuah chhan Lionel Messi-a club hlui Barca pan ai chuan Santiago Bernabeu-a input luh a thlang zawk.

Guler hi Premier League club Arsenal, Manchester United leh Newcastle United pawhin an duh a, Bayern Munich leh Paris St-Germain hming pawh lam rik a ni. Mahse, Madrid khawpui lamin a lung a len tlat.

Fenerbahce chuan an player hi €20mtd-a an chhuahtir thu an sawi a, a khelh ṭhat dan a zirin Real hian €10mtd an pek belh leh bawk ang–a kum leh a man zat thlirin Guler hian theihna sang tak a nei tih a lang.

Khawthlang media-ten an tarlan dan chuan Real hian player hi an hralh a nih chuan Fenerbahce hian an hralhna aṭangin 20% share an nei ve leh dawn bawk.

Guler hian kum 16 mi lek a nihin Fenerbahce tana a match hmasa ber a khel der tawh a, season hman zawh takah khan number 10 haktir niin, inelna hrang hrangah match 35 a khel a, goal ruk a khung–assist vawi sarih a nei.

Fenerbahçe tan season hnih khel tawhin match 51 a inlan a, goal kua khungin, assist vawi 12 a neihsak–season hman zawh takah khan Turkish Cup-ah a champion pui bawk.

Hei chauh a ni lo–nikum khan ram tana a match hmasa ber khelin, Turkey tan match li a inlan der tawh a, June 19 khan Wales laka 2-0 a hnehna an chan ṭumin ram tana a goal hmasa ber a khung– UEFA Euro 2024 qualifying match a ni.

Guler chuan, "Midfield leh right winger-a khelh nuam ka ti. Loan-a chhuah ka tum lo. Santiago Bernabeu ka rawn pan hian ka khelhna hmun chuh turin ka rawn kal a, loan-a chhuak leh tur ka ni lo," tiin a sawi a, hmun pawimawh a chang ang em, tih chu inelna ṭan hunah a chiang ang.