Fiahna paltlangtu Rybakina

Wimbledon hmeichhe champion lai Elena Rybakina chuan third round lut turin fiahna hautak a hmachhawn a, a khingpui Alize Cornet chu harsa angreng taka hnehin second round a paltlang a ni.

Ningani zan inkhelah Rybakina hian 6-2, 7-6 (7-2) in hnehna a chang, set hnihna an khelh lai hian Cornet-i hi a ke dinglam a na, enkawl a nih hnuah khel chhunzawm leh thei mah se set a la zo ta chuang lo.

Chak lo zawk Cornet hian Wimbledon-ah hian beisei loh result a lo nei tawh ṭhin, world number 74 hian kum 2014 khan third round-ah player ṭha Serena Williams a lo hneh tawh a, season hmasa khan a zawna match 37 chak tluang lai Iga Swiatek a lo hneh tawh bawk.

Seeded pathumna Rybakina hian a match lehpekah chuan Katie Boulter a hmachhawn ang. Tualchhung nula Boulter hian inkhel dangah Viktoriya Tomova chu 0-6, 6-3, 3-6 in a lo hneh ve thung a ni.

Player langsar ni ṭhin, mahse tun hnaia ranking hniam avanga wildcard pek ngai Elina Svitolina a hmuhnawm. Svitolina hian set hnihna an khelh laiin a mit (eye) lamah harsatna nei mah se, seeded 28-na Elise Mertens chu 6-1, 1-6, 6-1 in a hneh.

Kum 28 mi Svitolina hian 2019 khan Wimbledon semifinal a lo lut tawh, a match lehpekah chuan Sofia Kenin a tum ang. Australian Open 2020 champion Kenin hian Chinese nula Wang Xinyu 6-4, 6-3 in a lo hneh ve thung a ni.

Ningani zan hmeichhe singles inkhel dangah seeded palina Jessica Pegula chuan Cristina Bucsa chu 6-1, 6-4 in a hneh a, seeded pangana Caroline Garcia pawh chesual thei dinhmuna a din hnuin Leylah Fernandez lakah 3-6, 6-4, 7-6 (10-6) in a chak.

Player langsar dang - Grand Slam vawi hnih champion tawh Victoria Azarenka, US Open champion hlui Bianca Andreescu, seeded 20-na Donna Vekic leh seeded 14-na Belinda Benci te pawhin an khingpui ṭheuh an hneh.