Captain Azpi a chhuak - Chelsea hmabak eng nge?

Chelsea captain Cesar Azpilicueta chuan Stamford Bridge-a kum 11 zet hun a hman hnuin London club a chhuahsan ta a, Atletico Madrid tan season khat chhung khel turin contract a ziak.

Kum 33 mi Azpi hian Chelsea-ah kum khat dang cham turin contract la nei mah se inhriatthiam tawnnain a contract hi an titawp a, Diego Simeone-a hnuaia khel turin an ram club hi a pan ta a ni.

Azpi chuan, "Chelsea hi ka in a ni a, engtiklai pawhin a ni reng ang. Player ang ni kher lo pawhin, engtikah emaw chuan ka lo kir leh theih ka beisei," a ti a, Chelsea thlah hlen a tum lo.

London club hian coach thar Mauricio Pochettino hoa team thar din tumin hma an la mek a, club captain meuh pawh an chhuah leh ta - engtiang takin nge he team hi an indinthar dawn, hriat a châkawm ta hle.

Theihna hlantu

Azpi-a'n kum 11 zet hun a lo hman tawhna a mangṭha a, Spanish defender hian a mittui dan harsa a ti hle. Spain tana vawi 45 inlan tawh defender chuan, "Ka rilrua thil awm zawng zawng hi sawichhuah har ka ti a, a ropui takzet a ni.

"Ka theihna zawng zawng he club tan hian ka hlan a, ka hlim takzet," a ti a, London club tan 100% pea a inhriat avanga rilru inthiam tak chunga a chhuah thu a sawi - Chelsea fans tam tak lung erawh a leng ang.

Azpi chuan sawi zawmin, "Ka career-a hun tawn hlimawm ber thlan hi chu a awl khawp mai. Porto khawpuia Champions League nomawi kan chawi kha a ni - captain ka nihna anga ka nomawi hmasa ber a ni tlat," a ti.

Champions League 2021 final-ah Chelsea hian Manchester City chu 1-0 in an hneh a, Thomas Tuchel hoin team hmuhnawm tak an din chho dawn emaw tih laiin, thawnthu mai an chang ta.

Sulhnu ropui

Azpi hian Chelsea-ah sulhnu a hnutchhiah hraw hle - Premier League-ah vawi hnih a champion pui a, FA Cup, League Cup, UEFA Super Cup leh FIFA Club World Cup-ah champion nomawi a chawi bawk.

UEFA Europa League bikah vawi hnih champion nomawi a chawi a, Chelsea-ah hian champion nomawi chawi theih ang chu a chawi kim - Europa League 2018-19 Squad of the Season-ah a lang a, Champions League 2020-21 Squad of the Season-ah a lang bawk a ni.

Azpi hian August 2012 khan amah siam liantu Osasuna aṭangin Chelsea hi a zawm a, hetihlaia a man zat hi pound maktaduai 6.5 a ni - a man zat aṭanga tehin Blues tana a thawhchhuah hi a ropui tham hle.

Blues tan inelna hrang hrangah match 508 khelin goal 17 a khung a, assist vawi 56 a nei - kum 2019 khan Gary Cahill-a'n Blues a chhuahsan hnuin captain atan ruat a ni a, vawiin chuan captain armband leh Chelsea jersey a hlip ta.

An chhuak zel

"Pakhat zela an kal boin..." tih ang deuh a ni a, season hmasa lawka nasa taka inlei Chelsea squad a chhah lutuk hret a, inṭhuahfai hna an thawk mek - Kai Havertz (Arsenal), Mateo Kovacic (Manchester City) leh Mason Mount (Manchester United) te chu an elpui club-ah an kaltir a, Ruben Loftus-Cheek chuan AC Milan a pan bawk.

Mount hian, "An ruahmannaah ka tel ve tawh lo tih ka hria a ni," tiin Chelsea a chhuahsan chhan a sawi a, London club hian player thar hmanga team thar din an tum niin a lang.

Premier League club veka pem pathum bakah hian midfielder N'Golo Kante, goalkeeper Edouard Mendy leh centre back Kalidou Koulibaly te pawhin Saudi Pro League lam an pansan a, Chelsea-ah hmelhriat an tlem ṭan!

Season hmasa lawka Barcelona nen sawizawm an nih hnua kum hnih atana contract thar ziaktu Azpi pawhin a contract hmang zo loin a chhuak ve leh ta bawk a, Chelsea fan-ten lungleng takin season thar lo thleng tur an thlir a nih pawhin an demawm lo.

Beiseina

Chelsea hian nipui transfer-ah academy player-te nena chhiar telin player 23 ngawt an chhuahtir tawh a, chutihrual chuan London club hi bazar lo tawp an ni bik lo - player panga an lalut tawh a, hming langsara chhal theih erawh player pahnih chiah an ni.

La Liga club ṭha Villarreal aṭangin Nicolas Jackson chu £32mtd-in an lalut a, ani hian season hmasa khan inelna hrang hrangah match 38 khelin goal 13 a khung a, mahse, heng zinga goal kua hi April leh March-a a khung chauh kha a ni.

Senegal tan pawha vawi thum chauh la inlan hi Chelsea tana goal khungtu ni turin a rin tlak ang em, tih chu zawhna a ni. He league-ah hian goal khung nuam ti mi Erling Haaland, Mohamed Salah leh Harry Kane te an la awm tih hriat a ṭha.

RB Leipzig aṭanga £52mtd senga an lakluh Christopher Nkunku hi chu player thiam tih hriat tlan chian sa a ni a, season hman zawh takah khan hliam vanga a talbuai chungin inelna hrang hrangah goal 23 ngawt a la khung thei - Chelsea mamawh chhanna a nih leh nih loh chu hunin a hril ang.