Rinkai zinga mi Casper Ruud a tla

Wimbledon khelh laiah beisei loh result langsar bera chhal ngam a thleng - Ningani zan khan wildcard hmanga inlan Liam Broady chuan champion tura rinkai zinga mi Casper Ruud chu 6-4, 3-6, 4-6, 6-3, 6-0 in a hneh.

Centre Court-a inkhelah Ruud hi rinkai zawk a ni, seeded palina a nih phak avangin a match hmasa lamah ranking hniam leh player langsar lo a tum tia sawi theih a ni, mahse world number 142 hneh loin second round lekah a zinkawng a tawp.

French Open khelh zawh takah khan Ruud hian final a lut thei a, nomawi inchuhna inkhelah a chak lo. Clay court inelna lian hnuah a hahchawl a, grass court inelna lianah beisei a phak ta lo.

Grand Slam hnuhnung pangaah final vawi thum ngawt lut thei mah se Ruud hi a la champion lo vek - a vanneih hun a la herchhuak rih lo. Wimbledon bikah chuan a inlan hnuhnung pathumah beisei a phak lo vek a ni.

Mipa singles inkhel dangah seeded pakuana Taylor Fritz pawh world number 59 Mikael Ymer lakah 3-6, 2-6, 6-3, 6-4, 6-2 in a chak lo. Fritz leh Ruud te hi seeded sang zual 10 zinga tla hmasa pahnih an ni.

Grand Slam vawi thum champion tawh Stan Wawrinka erawhin seeded 29-na Tomas Martin Etcheverry chu 6-3, 4-6, 6-4, 6-2 in a hneh. Swiss star Wawrinka hian nizan khan seeded pahnihna Novak Djokovic a hmachhawn leh nghal a, result erawh kan hre hman lo.