Arsenal chhuahsantu Granit Xhaka

Granit Xhaka chuan Arsenal chhuahsanin Bayer Leverkusen a zawm. Bundesliga club hian pound maktaduai 21.4 zetin an lei a, season nga daih contract an ziahpui - kum 30 mi tan chuan a contarct hi a ṭha hle.

Switzerland midfielder hian 2016 khan Arsenal hi a zawm a, inelna hrang hrangah match 297 khelin goal 23 a khungsak. Emirates Stadium-a hun a hman chhung hian FA Cup vawi hnih a chawpui, season hmasa khan Premier League-ah pahnihna an ni.

Unai Emery hunlai khan Xhaka hian hun harsa a lo tawng tawh - anmahni ṭantute lamin an auel hman hial a, captain a nihna pawh hlihsak a tawk; kum 2021 khan chhuak tura ngaih niin AS Roma nen an inhnaih hman hle.

Mahse, manager thar Mikel Arteta a rawn lang a, thil a thlak danglam. Spanish manager hian cham turin a chelh a, club tan hmun pawimawh a chang chhunzawm - season hmasa phei kha chuan rinrawl niin fans pawhin an ngaina leh tawh hle a ni.

Gunners manager Arteta chuan, "Player ṭha leh ropui tak mai, club chhunga mi zawng zawngina kan ngainat lakah mangṭha kan tih a ngai ta si. Club tana a theihna zawng zawng hlan ṭhin a ni a, a ṭhiante rilrua Granit-a thil tuh hi kan tan a ṭangkai zel ang.

"Arsenal tana a thil tihte avangin Granit lakah lawmthu sawi sen loh kan ba," a ti. Sporting Director Edu pawhin Granit Xhaka chu Arsenal tana player pawimawh le hriatreng tawh tur a nih thu a sawi a, chona thar a hmachhawn tur atan duhsakna a hlan bawk.