Graham Potter hnuaiah Chelsea-in 'harhna' an chang chhunzawm zel a, Thawhlehni zan khan Red Bull Salzburg chu khualmualah 2-1 in an hneh - Champions League last 16 an inpetkai.

London club tan Mateo Kovacic leh Kai Havertz ten goal khat ve ve an khung a, Salzburg tana Junior Adamu goal khungin awmzia a nei phak lo - match 40 hnuah a vawi khat nan mahni mualah Salzburg an tlawm.

Chelsea hian hnehna an chan hian last 16 an lut nghal mai lo - mahse, a hnua group E inkhel dangah AC Milan chuan 4-0 in Dinamo Zagreb an sawp zui a, Chelsea hi um phak theih an ni tawh lo - Milan tan Matteo Gabbia, Rafael Leao, Olivier Giroud (penalty) leh Robert Ljubicic ten goal khat ṭheuh an khung.

Milan hi November 2 zanah Salzburg nen an inhmachhawn leh dawn a, an group aṭanga Chelsea zui tur a chiang ve leh chauh ang - Milan tan draw a tawk a, Salzburg tan chak ngei ngei a ngai thung dawn.

Potter-a Chelsea
Chelsea-in tun season Champions League-a an match hmasa berah Dinamo Zagreb chu 1-0 in an ngam lo a, coach Thomas Tuchel chu a tukah a hna aṭangin ban nghal a ni a, ani aia tawnhriat nei tlem zawk Graham Potter chu lakluh a ni.

English manager lakluhin titi a ti tam a, amah duh lotute ṭan chhan siam belh turin, Champions League-a a match hmasa berah Red Bull Salzburg chu 1-1 in an inhnehtawkpui a, Stamford Bridge-a inkhel an nih avangin sawisel an tawk nasa.

Mahse, Potter-a'n insiamrem turin hun a mamawh rei lo - AC Milan a zawna an hneh hnuah Salzburg an hneh leh ta a, match hmasa pahnih aṭanga point khat chiah nei team khan match khat khelh tur la awm chungin knockout round an lut der!

Potter-a hnuaiah Chelsea hian match kua khelin tlawm an la nei lo a, vawi ruk chakin, vawi thum draw an nei. Potter chuan, "Hmalam panin kan pen zel dawn - mahse, kawng awlsam a ni dawn lo tih kan hria a, zanin hi kan bul ṭanna zinga mi a ni," a ti.

A pianna ramah!
Salzburg khelmualah Chelsea tan Mateo Kovacic chuan minute 23-naah goal hmahruai a khung a, Austria-a piang midfielder hian yard 18 vela hla aṭangin, a ke vei lam hmang chungin a khung.

Kovacic chuan, "Ka pianna ram ngeia goal ka khung thei hi ka lawm a, ka chhungte bakah ka ṭhiante pawhin kan inkhel hi an rawn en a ni," a ti a, mahse, a chawn hliam vangin Croatian midfielder hi lakchhuah a ngai.

Chelsea-in goal dang an khung hmain Adamu chuan Salzburg tan si phurh a sut a, Blues ṭantute an hlauthawng hman - mahse, an rilru hahna leh buaina chinfel nan Havertz chuan minute 64-naah a khung ve leh a, Chelsea an chak.

Blues coach Potter chuan, "Kan match khelh apiangah chak kan duh a, chu chu kan rilru puthmang atana kan duh pawh a ni. Kartawpah match kan nei lehnghal a, a hnu lawkah kan nei lehzel bawk - chuvangin squad pawh siksawi zel a ngai," tiin a sawi.

Vanduai vannei
Salzburg khelmualah Chelsea vanneih zan ni se goal tam zawk khung thei an ni - mahse, Austrian club tan keeper Philipp Kohn a che ṭha a, Pierre-Emerick Aubameyang-a chance neih ringawt pawh vawi li ngawt a dang!

Jorginho-a tauh goal ngei tura lang chu Adamu chuan goal line aṭangin a lo 'clear' hman bawk a, chutihrual chuan Strahinja Pavlovic khung ngei tura lang Thiago Silva chuan line aṭangin a lo dang ve hman tho bawk.

Chelsea hian hliam vangin France midfielder N'Golo Kante, French defender Wesley Fofana, England defender Reece James leh Senegal defender Kalidou Koulibaly te chu an chhawr thei lo mek.

Mahse, World Cup khelh kum a nih miau avangin fixture a tawt lo thei lo a, Blues tan hmabak a hautak hle - London club hian Inrinni zanah league match khel turin Brighton & Hove Albion an mikhual dawn a, Potter-a club hlui an ni.