Boro boss thar Carrick a inpeih

Manchester United legend Michael Carrick chuan a nuam tihna hmun ringawt tlansan a, chona thar hmachhawn tura a inpeih thu a sawi - English midfielder hlui hi Middlesbrough coach ni tura lakluh a ni a, Chris Wilder a thlak a ni.

Carrick hian Old Trafford-ah kum 15 zet hun a hmang a, player, assistant coach leh manager lailawk angtein a hun a hmang. United hi coach lailawk ni chungin match thum a enkawl a, vawi hnih chakin, vawi khat draw result a neihpui.

Kum 41 mi coach chuan, "Nuam tihna hmun tlansan a, mahni theihna tak tak inhrechiang tura i enchhin a, mahni kawng sial a ngaih hun a awm ṭhin a, chumi atan chuan ka lo pen chhuak a ni," a ti.

Carrick chuan, "United ka chhuahsan hnu thla 10 chhung khan ka hmaah thil tam tak a rawn inchhawp ve a, mahse, ka thinlungah pawm theih lohna a awm ṭhin. Tunah erawh ka inpeih tawh a ni," a ti a, a hun takah thutlukna a siam thu a sawi.

Kum 41 mi Carrick hi Boro coach hlui Jonathan Woodgate chuan a pui dawn a, Woodgate hi June, 2019 - June, 2020 inkara Boro lo enkawl tawh a nih avangin Carrick tan chuan coaching staff zinga ani neih hi a hlu ang.

Jose Mourinho leh Ole Gunnar Solskjaer ten United an enkawl laia coaching staff zinga lo tel tawh, West Ham leh Tottenham Hotspur aṭanga hriat hlawh ṭan Carrick hi Boro-ah a mikhual dawn lo. Kum kua aṭanga kum 11 a nih thlengin Boro academy tan a lo khel tawh.

Boro hian Carrick hnuaia an match hmasa ber chu Inrinni, zan dar 7:30-ah an khel dawn a, Championship match khel turin Preston North End an mikhual ang - team 24 inelnaah 21-na an ni mek a, match 16 an khelh tawhah vawi li chiah an la chak.