Benzema tel lohna Real an tlawm

Champions League last 16 lut chiang tawh Real Madrid-in hliam vangin Germany-ah Karim Benzema leh Luka Modric an hruai thei lo a, an mikhualna ramah RB Leipzig chu 3-2 in an ngam lo.

Leipzig-in Champions League knockout round luh beiseina nei turin chak an mamawh tih an hria a, goal khung turin hun pawh an mamawh rei lo - Croatia defender Josko Gvardiol chuan minute 13-na lekah goal hmahruai a khung a, France forward Christopher Nkunku chuan minute 18-naah a belhchhah.

Minute 20 pawh a tlin hma hauhin Leipzig-in goal hnih an khung der a, Real an reh thung - mahse, Spanish champion mualpho lutuk tur ngaingam loin, Vinícius Júnior chuan minute 44-naah a khung ve leh a, 2-1 in chawlhlawk hman a ni.

Second half-ah Real an insiamṭha lo. Minute 81-naah Timo Werner chuan goal khat a khung ve leh a, 3-1 a nih tawh avangin chak tur a chiang tawhah ngaih a ni.

Mahse, Real hian hun pek belhah Rodrygo hmangin penalty an hlawh chhuak ve leh a, Brazilian forward hian pet nghalin goal-ah a chantir - goal dang luh nan erawh a tlai hret tawh a, Real an 'comeback' thei ta chuang lo.

Tun season-a a vawi khat nan Real an tlawm a, May 8 hnua tlawm leh tawh lo club hi Leipzig in an lo ngam a, an Champions League beiseina an chhi nung.

Group F inkhel dangah Shakhtar Donetsk leh Celtic te chu 1-1 in an inhnehtawk - Celtic tana Giorgos Giakoumakis goal hmahruai khung chu Ukrainian club tan Mykhaylo Mudryk chuan a sut a, goal dang a lut lo.

Shakhtar Donetsk hian point ruk an nei mek a, Leipzig-in point kua an nei thung - team pahnih hi November 2 zanah an intawng dawn a, last 16 lut tur chinfel a ni dawn.

Leipzig tan tlang turin draw result a tawk dawn a, Ukrainian club tan chak a ngai thung - an chak chuan point hmuh zat inang dawn mah se head-to-head a an ṭhat zawk dawn avangin an tlang thei dawn a ni.