Phuba lâk kan châk - Isak

Indian football-a tun season bul ṭanna, Durand Cup quarterfinal-ah Bengaluru-in 2-1 in Odisha FC an hneh hram a, chakna goal hi Roy Krishna-a'n minute 120+1-a a khung a ni.

He thil thleng avang hian Odisha thinlung hliam a la dam thei lo a, zanin dar 7:30-ah team pahnih hi ISL-ah an intawng leh dawn - Odisha forward Isak Vanlalruatfela chuan phuba lak an châk thu Vanglaini a hrilh.

Isak-a chuan, "Bengaluru hi kan huphurh lo. Durand Cup-a kan tlawm kha kan la hre reng a, tun ṭum chu phuba ang zawng pawhin ni se, hneh ngei ngei kan tum a ni tawp mai," tiin chak an tum thu a sawi.

Bengaluru FC academy aṭanga inzir chhuak Isak-a tan a club hlui laka a theihna pholan a châkawm ang tih a chiang - Thingsulthliah tlangval hian tun season-ah Odisha tan match thum a khel tawh a, assist vawi khat a nei.

Aizawl FC forward hlui hian khel ṭha ṭhin viau mah se, bul erawh a la ṭan lo a, minute a nei tam tawk lo. Isak-a chuan, "Engkimah ka lawm tawk vek a, bul ṭan hun pawh a la her chhuak ve leh mai ang.

"Tunah chuan theihtawp chhuah zel phawt hi ka tih tur chu a ni mai," tiin Vanglaini a hrilh - zanina Odisha hmachhawn tur Bengaluru hian Mizo player kawl an nei lo a, Odisha-ah pariat an awm thung.

Odisha-ah hian Isaka bakah forward Jerry Mawihmingthanga leh midfielder Isaac Vanmalsawma ten hmun pawimawh an chang a, anni bakah hian goalkeeper Lalthuammawia Ralte, defender Lalruatthara, Lalhrezuala Sailung, midfielder Paul Ramfangzauva leh forward CVL Remtluanga te an awm.

ISL-ah Odisha hian match thum khelh tawh aṭangin point ruk an nei a, Bengaluru erawhin point li chiah an la nei thung.