Kan thawh leh nghal a ngai - Jesus

Gabriel Jesus chuan Premier League hmahruaitu Arsenal chu an thawhchhuah leh nghal a ngaih thu a sawi. Gunners hi an league match hnuhnung berah Southampton nen an inhnehtawk a ni.

Mikel Arteta naute hian tun season league match bikah an khingpuite an inhnehtawkpui vawi khatna a ni a, chak loh vawi khat chiah an la nei. Heti chung hian an hmahruaina a nghet chuang lo, vawi khat lek chetsualah an dinhmun a hniam thei dawn.

Jesus chuan, "A nihna takah chuan Saints kha hneh kan inring a, chak theihna remchang pawh kha kan nei ṭha hle. Mahse, point hnih kan hloh ta si, goal khat aia tam kan khung thei lo kha a pawi lai chu a ni.

"Season bul kan ṭan fuh em em a, amaherawhchu kan duhthusam ang result neih reng theih a ni lo. Kan nihna ang taka kan khelh chhuah leh nghal a ngai, club dang ngaichang loin kan khelh ṭhat dan tur chauh kan ngaihtuah tur a ni ang," a ti.

Brazilian striker hian season bul a ṭan fuh, mahse tun hnaiah match nga chhung chu inelna hrang hrangah goal a khung ta lo. Saints lakah pawh remchang ṭha vawi hnih a hlah, club tana ṭangkai zual tur chuan goal khung a mamawh.

Arsenal hian zanin dar 10:15-ah PSV nen Europa League an khel zui dawn a, kartawpah Nottingham Forest nen Premier League an khel zui leh dawn bawk.