India batter tan hun ṭha

T20 Cricket World Cup-ah India-in vawiin chhun dar 12:30 hian Netherlands an hmachhawn dawn. Rohit Sharma hote tan chak ngeina tur inkhel a ni a, chutihrualin South Africa nen an inkhelh lehna tur atana inpuahchahna ṭha tak a ni thei ang.

Men in Blue hian match hmasa berah Pakistan an hneh a, Virat Kohli a ropui hle. Amaherawhchu batter dang KL Rahul (4), captain Rohit Sharma (4), Suryakumar Yadav (15) leh Dinesh Karthik (1) ten run tam an siam lo a, Netherlands nena an inkhel tur hi insiamremna hun ṭha a tih theih ang.

Inkhelhna tur hi Sydney Cricket Ground a ni a, mipui mit fukna tur chu Kohli bawk a ni ang. Netherlands captain Scott Edwards chuan, "Pakistan laka thilmak a tih ang khan Kohli a chet tawh loh ka beisei. Tute mahin kan chak an beisei lo a, chuvangin pressure kan nei lo," tiin inkhelh tur chungchang a sawi.

Inkhel dangah South Africa-in chawhma dar 8:30-ah Bangladesh an hmachhawn dawn. Proteas hian match hmasa berah ruahsur vangin point hnih an hlawh chhuak thei lo a, an chak ngei a ṭul tawh.

Tlai dar 4:30-ah Pakistan leh Zimbabwe te an inkhel bawk ang. Shaheens tan chetsual a thiang lo a, captain Babar Azam pawhin match hmasa bera a mualphona hliahkhuh nan run tam zawk siam a mamawh ang.