Ruud hnehtu Wawrinka a tlang

Tennis inelna Swiss Indoors khelh laiah Stan Wawrinka chuan seeded pathumna Casper Ruud hnehin second round a inhlangkai a, inkhel dangah world number 1 hlui Andy Murray chuan hnehna a chang ve bawk.

Grand Slam vawi thum champion tawh Wawrinka hian aces vawi kua siam chungin 6-4, 6-4 in hnehna a chang, tun hnai an result neih dan chhut chuan Ruud tan mualphona a tling.

US Open khelh zawh takah khan Ruud hian final a lut hial a nih kha, tun ṭumah pawh hian seeded pathumna a ni phak. Mahse, tun hma lama ṭha ṭhin, tun hnaia tlahniam ta Wawrinka khelh fuh ni a tawng a, a ṭang tlang zo lo.

Swiss tlangval Wawrinka chuan, "Hliam leh harsatna hrang hrang ka hmachhawn a, chumi kara hnehna ka chang ve leh hlauh ṭhin hi a lawmawm, a bik takin mahni ram mipui hmaa hnehna chan chu a lawmawm bik," tiin a sawi.

Inkhel dangah Murray chuan Roman Safiullin lakah 6-7 (5), 6-3, 6-4 in hnehna a chang ve thung, set hnuhnung berah Murray hi 4-1 in hnufual hman mah se huaisen takin a tho chhuak a, second round luh phu zawk a nih ang ngeiin a tlang.

Kum 35 mi Murray chuan, "A ngai renga ka khelh kha chuan chak lo thei ka ni tih ka inhria, ka khelh dan phung ka thlak hlek a, chumi rah chhuah chu ka chhawr ta a ni," tiin a thawh leh dan a sawi.

Murray leh Wawrinka te hi an kaltluang zel a nih chuan quarterfinal-ah an inhmachhawn thei dawn. Player pahnih hi major title pathum ve ve la tawh an ni a, an vanglai liam tawh mah se an khelh fuh ni chuan hmachhawn châkawm lo tak an la ni phak.