Mi pangain final an lut fel ta

Thawhlehni zan khan Mahindra Pikup 4x4 LPS Pro Muaythai 2022 semifinal khelh a ni a, fight panga awmin a hmuhnawm vek. Nizan khan semifinal zan hnihna neih a ni a, final khel tur a hriat kim nghal ang.

Joseph Vanlalhruaia'n a khingpui R. Lalbiaktluanga a pettlu a, tho leh mah se harsatna a nei a, round hnihna an ṭan rualin 2019 Asian silver medal latu Hruaia'n vir pahin a tai bawr velah a tlawh a, national gold medal pahnih la tawh Biaktluanga tluin a bei zui thei tawh lo.

Bantamweight-ah Eric Biakthianghlima'n nawr nghal chiam mah se Lalruatkima'n nghet takin a bei let a, a pet tluk hnuah hnek zawnin Ṭhuampui rawlthar a chi ai a, national gold medal pali la tawh Ruatkima'n minute khat leh tlem chhungin a ching fel hman.

George Lalmuanawma'n leightweight-ah Lalṭhazuala a hneh, Round hmasa berah national gold medal pakhat la tawh Muanawma'n a hmaiah a petsak. Mahse, Ṭhazuala'n bei letin round hnihna tirah a hnek tlu ve thung a, an innuai nasain an inhnehtawk hle.

Welterweight-ah Isaac Lalchhuanmawia chu minute hnih tling lo deuh chhungin a chak. Muaythai tawnhriat nei lo pahnih in fight-ah Malsawmtluanga'n tharum hmang nasa mah se Chhuanmawia a inveng thiam, a khupa a do fo hnuah hnek zawn lehin Chhuanmawia a chak.

Kum 2021 world championship-a tel phak Lalṭhasanga Lelhchhun tan kawng a awlsam. Super middleweight-ah amah aia sang Roluahpuia bei mah se kawng engkimah a chungnung, a chawnah petsakin Roluahpuia a tlu a, tho leh mah se Ṭhasanga'n bawhzuiin minute hnih an inbeih hmain a chak fel.

Flyweight
Joseph Vanlalhruaia (Hunthar) bt R. Lalbiaktluanga (Zemabawk)
Knockout (Round 2, 19 sec)
Bantamweight
Lalruatkima (Falkland) bt Eric Biakthianghlima (Ṭhuampui)
Knockout (Round 1, 1:11 min)
Lightweight
George Lalmuanawma (Chawnpui) bt Nazareth Lalthazuala (Zemabawk)
Split Decision (29-28, 28-29, 29-28)
Welterweight
Isaac Lalchhuanmawia (Chanmari) bt Malsawmtluanga (Dinthar)
Technical Knockout (Round 1, 1:57 min)
Super Middle Weight
Lalthasanga Lelhchhun (Tanhril VT) bt Roluahpuia (Zemabawk)
Technical Knockout (Round 1, 1:58 min)
D3 Haier Fighter of the Night: Joseph Vanlalhruaia (Hunthar)