PSG nuih niah Juve an ṭap thung

Lionel Messi, Kylian Mbappe leh Neymar te awmna Paris St-Germain chuan nuamsa takin Champions League last 16 an lut. Paris club an lawm viau lai hian group H aṭangin Juventus an tla thung!

Ligue 1 champion PSG tan Messi leh Mbappe ten goal hnih an khung a, assist vawi hnih ve ve an nei bawk. Anni pahnih bakah hian Neymar leh Carlos Soler ten an khung, anmahni lamah Shon Goldberg chuan a ti lut bawk; PSG hian Maccabi Haifa 7-2 in an hneh.

Juventus erawh an che thei lo, chak ngei ngei ngaihna inkhelah Benfica an lenchilh a, Italian club ropui hi Portuguese club lakah 4-3 in an tlawm, tunah chuan Europa League khelh chhunzawm tura an inbuatsaih a ngai tawh ang.

7 star PSG
Thawhlehni zan khan Paris khawpuia inkhel an ni bawk a, a tir aṭanga a tawp thlengin Paris St-Germain an chungnung a, tun hnai kum 11 chhung chu a zawnin Champions League last 16 an lut ta.

Messi-a'n hattrick a siam teuh hle, mahse cross bar a tih per hlauh - UCL bikah hattrick a siam zat chu vawi riat a la ni chhunzawm. Group stage bikah erawh goal 80 a khung tling ta a, hetiang ti thei hmasa ber a ni hial.

PSG coach Christophe Galtier chuan, "Ka naute khan nuam ti takin football an khel a, a bik takin tlarhma pathum khan khelh ho kha nuam an ti takzet a, a rah chu an goal khung zatah khan a chiang hle.

"Last 16 kan thleng hi ka lawm, a tawpna tur erawh a la ni lo. Turin khawpuiah kan la inkhel dawn a, group hmahruaitu nih ngei tumin kan bei ang," tiin a sawi, an hnuaia awm Benfica nen point 11 ve ve an nei mek a ni.

Mangṭha Juve
Juventus chuan 2013-14 season hnua a vawi khat nan Champions League last 16 an khel dawn lo. Old Lady hi an group match panga zinga paliah an tlawm a, point thum chauh an la neih avangin an tlak a ngai.

Juve hian Antonio Silva, Joao Marino leh Rafa Silva-a goal hnih hmangin vawi thum hma an hruai. Serie A club lamin Moise Kean, Arkadiusz Milik leh Weston McKennie hmangin an khung ve a, si phurh an sut zo thei lo.

Juventus coach Massimiliano Allegri chuan, "Tlak hi a na, a hrehawmin a zahthlak takzet bawk. Mahse, tunah chuan Serie A lam kan ngaihtuah tur a ni ang, kan taksa leh rilru siamthar kan ngai hle," tiin a sawi.

Serie A-ah pawh Juve hi pariatna an ni mek a, an dinhmun a ṭha lo. Beiseina sang tak nena an lakluh Allegri hian an duh ang result a la neih pui thei lo a, player ṭhenkhat hliam ve bawk mah se tuna an dinhmun aia sang thleng thei tur chu an ni, a hna a chan a nih pawhin a mak lo ang.