Chhingcows an tho; Electric Veng an fei

Honda MPL9-ah Chhinga Vengin match thum chhung chak hmel an hmu lo a, kar liam ta khan Chawnpui FC hneh loin a vawi khat nan an tlawm bawk. Nimin chhunah RG Stadium-ah erawh Chhingcows tan Lalengzama Vangchhia a vul a, Lunglei tlangval goal hnih hmangin FC Bethlehem 2-0 in an hneh a, point thum hlu bik an hlawh chhuak.

Electric Veng FC-in coach thar Lalremtluanga hnuaiah harhtharna an chang a, khelmual chhungah an ṭang thei hle. Nimin tlai khan EFC hian Lalsangzuala Hmar enkawl Chawnpui FC an chelh a, 0-0 a inhnehtawkin point khat hlu tak an hlawh chhuak.

Chawnpui erawh an elpui Chhingcows-in point thum an hmuh avangin goal difference vangin panganaah an awm rih a ṭul ta thung.

Zamzama ke dinglam
Chhinga Veng hian MPL kaithar FC Bethlehem laka hnehna chang turin inkhelah an chungnung lo a, team pahnih danglamna erawh Zam Zama ke dinglam a ni.

Minute 22-naah AIFF Elite Academy chhuak Zamzama hian freekick aṭangin goal kilah tak a pet lut lo a, Bethlehem goalkeeper Lalchawisana tan tih theih a awm lo.

Second half-ah pawh Zamzama bawk a langsar a, Lunglei tlangval freekick pet chu Bethlehem defen-der Hmingthanmawia'n tauh pialin goal-ah a lut leh bawk.

Chhinga Vengin 2-0 in hnehna chang mah se Zamzama freekick bak chance ṭha an nei thei meuh lo a, Bethlehem erawhin an chance ṭha neih an hlah thung. Chhingcows keeper RS Lallawmzuala'n goal theihna tura ngaih ṭum thum lai a dang a, Bethlehem forward Lalbiakdika'n freekick aṭangin woodwork a pet per - MPL club kai thar an vanduai.

EFC himna keeper Hriata
Electric Vengin relegate loh duh vangin chak an tum a, Chawnpuiin semifinal khelh duh vangin point thum hmuh an tum thung. Hemi a nih avang hian nimin tlai MPL inkhel hi a hmuhnawm a, chance pawh a tam - a tawpa danglamna thlentu erawh EFC keeper C. Vanlalhriata a ni.

Coach tawnhriat nei ṭha RT-a awm hnuah Electric Veng an huaisen sawt a, Bethlehem laka 3-1 a an hnufual hnuah tho chhuakin point khat hlu tak an hlawh chhuak. Match thum chak zawn tawh Chawnpui lakah pawh EFC hi an ṭang thei hle.

Coach Lalsangzuala Hmar hote goal bawh a na a, goal chance pawh an ngah. Amaherawhchu, C. Vanlalhriata'n a hna a tlin a, Electric Veng keeper hian Chawnpui forward-te goal khung tur ṭha tak takin a dang. Goal khung thei striker MC Malsawmzuala te an hawihai hle.

Electric Veng an bet mawl tawp bik lo, awmze neiin an nawr ve tho. Hun tawp hma hretin C. Lalnunmawia cross ṭha bik chu Zothanpuia'n (Puipuia) tauh fuh mah se goal ban a per - goal-ah lut ngat se sut ngaihna a awm tawh lo ang.

Inkhelh banah coach Sanga leh RT-a ten point khata an lungawi loh thu an sawi ve ve a, hei hian inkhel a hrilhfiah ber ang.