Ireland-in England an barakhaih
T20 Cricket World Cup-ah thilmak a thleng. Nimin khan England chuan team tenau zawka ngaih Ireland an hneh lo a, group 1 aṭanga semifinal lut tur hriatthiam a har sawt.
Nimin chawhnu lama Afghanistan leh New Zealand inkhel tur chu ruahsur vangin khelh theih a ni lo a, match hmasa bera Australia sawptu Black Caps tan point khata lungawi a ngai.
Thawhlehni zan khan Australia-in hnehna an chang thung a, inelna thlengtu hian Asia champion Sri Lanka chu wicket sarihin Perth-ah an hneh. Group 1-ah New Zealand-in point thum an hmu a; Sri Lanka, England, Ireland leh Australia ten point hnih ṭheuh an hmu. Table mawngphaha awm Afghanistan-in point khat an hmu tawh thung.
Kan tisual - Buttler
Ireland leh England te hi Melbourne Cricket Ground-ah an inhmachhawn a, Ireland-in bat hmasain 157 runs siamin an thi fai vek. England tan chak harsa tur niin a lang lo a, amaherawhchu captain Jos Buttler-a'n run a siam lo.
A khat mawi tawkin England-in wicket an hloh a, ruahsur vangin an khel zo thei lo. England hian over 14.3-ah 105/5 an siam a, DLS method hman niin chak tura an mamawh 111 runs an siam phak loh avangin 5 runs-in an chak lo.
England captain Buttler chuan, "Tihsual kan ngah avangin pressure kan neih tam phah a, kan chak loh hi kan tihsual vang a ni. Australia nena kan inkhelh hunah kan chet ṭhat ngei a ṭul tawh ang," tiin a sawi.
Aussies an tho
Perth Stadium-ah Australia leh Sri Lanka an inhmachhawn a, Aussies hi ṭhumvawrah chakin vawm hmasak an thlang. Lions tan Pathum Nissanka (40) leh Charith Asalanka (38*) te che chhe lo mah se over 20-ah 157/6 runs an siam pha a, chakpui tham a ni.
Amaherawhchu Marcus Stoinis a rawn che ropui a, thi loin ball 18 lekah 59 runs a siam a, over 16.3 lekah Aussies hian 158/3 runs siamin hnehna an chang.
Stoinis hi T20 World Cup-a Australia tana 50 siam rang ber a ni a, half century siam tur hian ball 17 chiah a mamawh. Aussies batsman-in a tluk loh chu Yuvraj Singh a ni a, Indian batter Yuvraj-a'n ball 12 lekah half century a lo siam tawh a ni.