Cristiano Ronaldo-a'n training a zawm

Manchester United forward Cristiano Ronaldo chuan a ṭhiante zingah training a zawm ve leh ta a, zanina Sheriff Tiraspol nen Europa League group match an khelh hunah a inlan ngei a rinawm.

Ronaldo hi Tottenham nen an inkhelh ṭumin, inkhelh zawh hmain stadium aṭangin a chhuak. Manager Erik ten Hag-a'n a hrem zui - Premier League a khelh tir loh bakah senior team zingah a training ve lo.

Hremna hi match khat atan bak a ni lo, tun karah erawh Man United senior team zingah ṭha takin training a zawm thei leh tawh. Ronaldo bakah hliam vangin Aaron Wan-Bissaka, Donny van de Beek leh Harry Maguire ten Blues an hmachhawn thei lo a ni.

Wan-Bissaka leh Maguire te an dam tawh a, manager Ten Hag-a'n a duh a nih chuan a chhawr thei tawh ang. Hetihlai hian Anthony Martial erawh a la inkhel ve thei dawn rih lo thung.

Ten Hag chuan, "Training chu a nei ve tawh ngei mai, mahse atan inkhelh nan chuan a la hma lutuk," tiin Martial chungchang a sawi. France international hi Ten Hag-a duhzawng tak a ni a, amaherawhchu hliam vangin a chhawr mumal thei lo.

Europa League ni mah se Man United tan chetsual a thiang lo. Match li an khelh tawhah point kua an hmu a, group E-ah pahnihna an ni mek, an chungah hian point 12 hmutu Real Sociedad an awm.

Group hmahruaitu hian last 16 an lut nghal dawn, pahnihna erawhin last 32 (playoff) an khelh a ngai dawn. Kum thara match hautak tak pahnih khelh belh tur neih ai chuan, group match lama theihtawp chhuaha hmahruaitu nih theih a pawimawh hle.