GSW chak loh niah Thompson hnawtchhuak

Klay Thompson chuan basketball a khelh hun chhunga a vawi khat nan hnawh chhuah (ejected) a tawk. Nimin zing NBA regular season inkhelah Thompson awmna Golden State Warriors chuan Phoenix Suns 134-105 in an hneh lo.

Third quarter zawh dawnah Thompson leh Devin Booker te chuan technical foul an nei a, hrem a nih vanga a lungawi lohna chu Thompson hian nasa takin a lantir - NBA champion vawi li ni tawh hi hnawhchhuah a nih phah.

Footprint Center, Phoenix-a inkhel hi a boruak a sang hle. Warriors head coach Steve Kerr pawhin technical foul a nei a, Draymond Green bakah Suns player pahnih Deandre Ayton leh Chris Paul te pawhin dan an bawhchhe bawk.

Suns chak theih nana point 34 neitu Booker chuan, "Klay Thompson hi ka player ngaihsan leh entawk tak a ni ṭhin, mahse court chhungah chuan hmelma anga kan inhmachawn a ngai," tiin a mi nghaihsan nen an inkhelh thu a sawi.

Warriors thiampuipa Stephen Curry-a'n an match hmasa pathumah point 33 a nei tling vek; Suns lakah erawh Curry hian point 21 chauh a nei a, nei hnem angreng viau mah se ani tih atan chuan a tam tawk lo.

Nimin zing inkhel dangah New Orleans Pelicans chuan Dallas Mavericks 113-111 in an hneh. Pelicans player an ṭangrual ṭha, player pariat ngawtin point 10 an nei tling thei a, thawhhona ṭha chu an chak chhan a ni.

Washington Wizards pawhin Detroit Pistons chu 120-99 in an hneh. Club pahnih intawn hnuhnung parukah Pistons hi an chak fai vek, Pistons hi tun season kal lai bikah pawh chak ni hmel la hmu miah lo an ni ve thung.

Oklahoma City Thunder chuan tun season atan chak ni hmel an hmu ve ta. Thunder hian Shai Gilgeous-Alexander-a point 33 hmangin Los Angeles Clippers chu 108-94 in an hneh a ni.