Haaland inhliam zanah City an tlang
Borussia Dortmund khelmualah Manchester City-in goal an khung thei lo a, German club-in an khung thei bik lo - team pahnih hi 0-0 in an inhnehtawk a, mahse, Champions League last 16 an luh ve ve avangin an lungawi tho ang.
Mahse, City tan thil lawmawm lo a awm a, an striker chhuanvawr Erling Haaland chuan a ke phahah hliam a tuar a, a damsam lo bawk - he thu buatsaih a nih lai hian a dinhmun tur sawi theih a la ni lo.
City boss Pep Guardiola chuan, "Thil pathum a awm - a chau hle tih ka hmu phawt a, a pahnihnaah chuan hritlang vangin a awm a nuam lo a, Joao Cancelo ang thoin a nuamsam lo.
"A keah hliam a nei leh bawk a, chuvang chuan second half kha a khel thei lo a ni. Chawlhlawk khan medical staff-te nen kan inbia a, an ngaihtuah deuh a ni," tiin Haaland chungchang a sawi a, Cancelo damloh thu a sawi tel bawk.
Pep-a tan lawm lohna tur dang a awm a, an penalty hmuh chu Riyad Mahrez-a'n goal-ah a chantir thei lo. Spanish coach-in kum 2016-a City a enkawl ṭan aṭangin, Manchester khaw club hian penalty vawi 80 an hmu tawh a, vawi 25 chu an pet goal lo.
City boss chuan, "He club ka enkawl hnuah hian penalty vawi 25 kan hlah tawh a, a tam zawk chu Champions League-ah a ni - a tam mah mah tawh a ni," a ti a, a lawm lo.
Pep chuan sawi zawmin, "Huaisen taka penalty pet ngamte huaisennain fak a phu a, mahse, penalty kan hlah ngun lutuk hi a dik thei lo. Hma kan sawn a ngai, Champions League-ah chuan kan inkar a zim ṭhin a, hetiang te te hian danglamna a thlen thei tlat a ni," a ti.
City hian Pep-a hnuaiah Champions League-a penalty vawi 17 an hmuh aṭangin vawi 12 an chhuih goal a, 71% a tling. Premier League-ah vawi 52 hmu tawhin vawi 36 an pet goal a, 69% chiah a ni thung.
Pep-a'n lawm taka hawn tur a neih erawh group hmahruaitu ni chunga last 16 an lut chu a ni a, match khat khelh tur la awm mah se Dortmund tan um phak theih an ni tawh lo.
Group G inkhel dangah Sevilla chuan 3-0 in FC Copenhagen an hneh a, Youssef En-Nesyri, Isco leh Gonzalo Montiel ten goal khat ṭheuh an khung. Mahse, Dortmund-in City an chelh avangin Sevilla tan last 16 beisei tur a awm tawh lo.