UEFA Nations League mai ni mah se, football tuichilhtu England leh Germany inkhel a nih avangin Thawhṭanni zan inkhelin ngaihven a hlawh a, inkhel pumpui thlir chuan ram pahnih hi World Cup hmachhawn turin an la inpeih tawk lo deuh.

Three Lions leh an mikhual hi 3-3 in an inhnehtawk a, inkhelh zawhah goal khungtu aiin penalty a chawi bakah a tihsual vanga goal an chhuah phahna Harry Maguire chuan sawi zui a hlawh - Gareth Southgate tan chhawr zui chi a ni dawn em, tih chu zawhna lian tak a ni.

Inhnehtawk
Wembley Stadium-a inkhelah goal kan hmu mai lo, tun hnaia goal khung harsat tak England chuan an ze ṭha lo an kalsan thei dawn lo ni pawhin a lang hman, chawlhlawk hma chuan goal an khung thei lo.

Second half tir lamah Maguire-a'n ball a pass sual a, lo chang fuhtu Jamal Musiala chuan box chhungah a lalut - English defender hian a tihsual thup tum nan Musiala hi a ti tlu zui a, penalty chawiin Ilkay Gundogan chuan chiang zetin a khung.

England an insiamrem nghal lo, defender Maguire ball hloh aṭang bawkin Germany lamin an vaw let a, box pawn aṭangin Kai Havertz chuan mawi zetin a khung a, anmahni mualah Southgate-a naute an mualpho - goal dang pawh chhuah belh thei an ni.

Bench aṭanga lut Bukayo Saka leh Mason Mount ten danglamna an siam, defender Luke Shaw-a'n hnai tak aṭangin an si phurh a sut ṭhen a, chumi hnu lawkah Saka hian amah ang bawka substitute Mount tan a siamsak.

England boruak a nung zui a, hun tawp dawnah an phur zual. Jude Bellingham-a penalty hlawhchhuah Harry Kane-a'n a khung chu chak nan an hmang daih dawn niin lang hman mah se, a tawpah Havertz bawkin inhnehtawkna goal a khung.

Tlarhnung buaina
Gareth Southgate-a'n hliam vangin Jordan Pickford a chhawr thei lo a, a hmunruak luahtu Nick Pope chu keeper vantlang a ni - World Cup atan meuh chuan champion pui a harsa mai thei, thlan tur dang an la neih chu Arsenal keeper Aaron Ramsdale a ni.

Manchester United manager Erik Ten Hag-a'n a rin ngam loh Maguire chuan rin a la hlawh a, mahse ram lian lakah a mualpho. Red Devils tan a khel phak lo zel a nih chuan ram tan pawh hmun nghet chan a harsa mai thei, mahse tuin nge thlak ang, tih chu zawhna awm thei a ni.

Tlarhnung laiah player pathum dah an ni ṭhin. Maguire bakah John Stones hi Manchester City defender an dam kim a nih chuan rinrawl a ni lo, a sira tlan ṭhin Kyle Walker chu a laiah dah a ni bawk - Eric Dier pawh hi Antonio Conte-a'n tun hnaia a chhawr thar a ni bawk.

Right back pali ngawt koh an ni a, an match hmasa zawka chhawr loh Trent Alexander-Arnold chu inkhelh hmain squad-ah a awm dawn lo tih sawi chian a ni. Liverpool defender hi World Cup-ah pawh rinrawl a nih a rinawm ta lo bawk.

England hian player hriat hlawh leh langsar an ngah a ni mai thei, mahse, tun dinhmunah chuan an tlarhnung a nghing nasa. World Cup hmain hun a tam tawh lo, club tana khel ṭha pangngai nge khel phak mumal lo a ring zui dawn tih chu kan hre thuai dawn.

Hmabak nei Germany
Hansi Flick enkawl Germany hi team ṭha leh World Cup champion tura rinkai zinga mi an ni. Amaherawhchu, Nations League khelh laiah Italy leh Hungary te an tluk lo, ram pali inel zingah pathumna an ni - an hnuaiah England chiah an awm.

Flick-a naute hian Timo Werner an nei a, Chelsea tana che fuh lo hi Bundesliga-ah a kir leh tawh - ani hi a khelh fuh ni chuan chakpui tham a ni. Blues forward Kai Havertz chu tlarhma laiah a khel thei bawk - a hlauhawm leh hlauhawm loh chu Maguire zawh mai chi a ni ang.

Match ruk aṭanga goal 11 khung thei Germany hi tlarhma lamah chuan an buai hran lo, a sira tlan Leroy Sane leh Serge Gnabry te bakah tawnhriat ngah Thomas Muller te pawh goal khung thei pangngai tak vek an ni.

Goal khung thei viau mah se a hnung lam a pawp ve tho. Captain leh keeper rinrawl ni bawk Manuel Neuer chuan hripui vangin England hi a hmachhawn thei lo - ani hi a inlan thei a nih chuan si ban nghak turah chuan buaina an nei lo ang.

Hungary an hneh loh ṭum khan tlarhnung laiah Antonio Rudiger leh Niklas Sule te an inkawp a, goal an chhuah. Three Lions lakah Sule leh Nico Schlotterbeck te an inkawp a, a phui chuang lo; world champion nih tum tan a hnung lam rem phui a ngai dawn.