FC Venghnuaiin Police an barakhaih

Zote Honda MPL9 a ngaihnawm zel. I Day Football champion Mizoram Police-in MPL9-ah hneh loh an tawng ve ta a, an ngam loh chu FC Venghnuai an ni.

Nimin tlai RG Stadium-a inkhelah Venghnuaiin Lalnunsiama goal khung hmangin Police 1-0 in an hneh a, chance ṭhahnem tak an hlah bawk.

An zuam sual?
Police-in bul ṭantu zingah Aizawl FC an hneh ṭuma goal awmchhun khungtu Malsawmfela telh loin, bench-ah dah a ni a, player khel ṭha dang F. Lalrinpuia chu hahdamtir a ni bawk.

Under 18 player pakhat chauh chhawr a ṭul laiin coach Lalbiaksanga Colney-in defender Daniel Lalliana bakah midfielder Joseph Lalrinawma a rawn dah lut a, Police team hi an ṭhat dan berin an khel loah a ngaih theih.

Venghnuai an che ṭha
FC Venghnuai pawhin captain Vanlalthanga bakah tawnhriat nei ṭha Lalrammuanpuia te bench-ah an dah ve tho a, defender Lalruatfela chu hrem vangin an chhawr thei lo.

Amaherawhchu coach Rindika Hmar-in Chanmari FC an hneh ṭuma khel ṭhate a ring nawn a, Ruatfela aiah midfielder Lalruatfela (RF-a) chu defence laiah pawt letin a tifuh hle.

Venghnuai hian first half-ah Tea Chinzah hmangin chance ṭum hnih an nei a, goal an khung lo. Hun chanve hmalamah goal a lut lo a, darkar khat bawr velah Venghnuai midfielder Lalbiakzuala tauh lut tur chu Police defender Lalhmunmawia'n a kutin a dang. Ahmuntea hi hnawhchhuah a ni a, penalty a chawi bawk.

Venghnuai tan defender Lalnunsiama rawn pen chhuakin Police keeper F. Lalmuanawma a rawn bum a, minute 63-naah chakna goal a khung.

Rindika hote hian goal khung belh theihna hun ṭha an nei a, substitute VL Thanga goal khung chu offside vangin pawm a nih loh bakah Apuia'n keeper Muanawma chauh a hmachhawn hnuah a pet goal lo bawk.

An vanduai
Police an khel ṭha tawk lo a, chutihrualin vanduai lo se point hmu thei dinhmunah an ding tho. Captain Lalfakzuala goal khung chu Sawmfela kut a per vangin pawm a ni lo a, Lalbiakhlua (Biaktea) goal khung pawh offside vangin pawm a ni lo bawk.

Inkhelh banah Police coach BS-a Colney chuan, "Kan goal hnih khung an pawm lo kha replay ka en châk khawp mai," tiin thil thlen dan ennawn a duh thu a sawi a, result danglam phahna chhanah a ngai.

BS-a chuan sawi chhunzawmin, "Kan chak loh hi a pawi phah lo. Kan la khel dawn chauh alawm. Venghnuai an khel ṭha a, goal chance kan ngah zawk," tiin a sawi. Police hian hun tawp lamah player 10-a an khelh avangin an nawr na tawk lo.

Pahnihna Venghnuai
FC Venghnuaiin season bul ṭan ṭha tawk lo mah se match hnuhnung pahniha an chak avangin table-ah pahnihnaah an invawrh chho a, I Day Football-ah semifinal an thlen tawh bawk avangin Rindika Hmar hote hi dah hniam theih an ni tawh lo.

Venghnuai coach Rindika Hmar chuan, "Game plan A leh B kan nei a, tunah rih chuan kan game plan hi a fuh rih. Eng nge kan an zel dawn tih chu hunin a hril ang. Ṭantu kan nei ṭha berin ka hria a, hei hi kan chakna hnar a ni," tiin anmahni ṭantute chungah lawmthu a sawi.