Federer anga thlah ka phu lo - Murray

Tennis player ropui Roger Federer-a'n tun hnai khan inkhelh a chawlhsan a, world number 1 pawh lo ni tawh Andy Murray chuan Federer-a an thlahna anga ropui chu a phu ve lo tih a sawi chhuak.

Laver Cup-ah Federer hian a match hnuhnung ber a khel, khawvel huapa mipa tennis player ṭha thlan khawmte kiangah a hun hnuhnung a hmang a, a elpui ni ṭhinte chuan mittui nen legend hi an thlah a ni.

Grand Slam vawi thum champion Murray chuan, "Roger chuan a hun hnuhnunga kan thlahna ang kha a phu thlap, player ṭha dangten ui tak chunga an thlah kha a nih dan tur dik tak pawh niin ka hria.

"Engtik niah emaw chuan ka hun tawp pawh a la thleng ve dawn, legend kan thlahna ang hi chu keini tan chuan a inrem ve lo, ani chu mi bik a ni," tiin a sawi a, tennis a chawlhsan hun tur tak erawh a la sawi thei lo thung.

Britain tlangval Murray pawh hi a hun a tawp hnai tawh, kum 35 mi ni tawhin season thum aia rei chu hliam vangin a buai tawh. A chawl dawn emaw tih hnuah a lo kir leh ṭhin a, mahse ngai erawh a la awh thei bik lo.