Joshua nen kan inhmachhawn dawn lo - Fury

Tyson Fury chuan heavyweight world-title fight-ah Anthony Joshua nen an inhmachhawn dawn lo tih a sawi a, Joshua-te lamin a hun tiam ral hmaa contract an tihfel hman loh vang niin a sawi.

WBC champion Fury hian Thawhṭanni thleng khan Joshua hi hun a pe a, mahse, Fury chuan a British pui boxer hian a chona contract chu a hming a ziah hnan hman lo niin a sawi a, tun dinhmuna a lan dan chuan an inhnek dawn lo.

Fury chuan, "Tunah chuan hun tiam a tawp ta e, Thawhṭanni khan a tawp a, eng contract mah ziah a ni lo a, a hmaa kan thil chhawp chu ngaihthahin a kal ta.

"Theihnghilh rawh u, Gypsy King hmachhawn tur hian huaisenna i nei lo tih hi chu ka hriatna a rei tawh. Eng pawh sawi la, ka tan eng a ni lo - i career leh i nun kal zel tur atan duhsakna ka hlan a che, a tawp ta," tiin a sawi.

Joshua team-te hian a thuphungin Fury a dawrna hi an pawm hman a, December 3-a fight neih tur atan hian sum pawh 60-40 a insem tura tih a ni - Thawhṭanni khan BT Sport leh streaming service DAZN aiawhte indawr tura tih an ni bawk.

Mahse, Fury-a'n fight a thlen loh tur thu a sawi leh ta a, an kal zel dan tur hriatthiam a harsa ta hle - Joshua promoter Eddie Hearn chuan Fury sawmna chu a thuphungin pawm mah se, contract ziak thlap tur chuan Thawhṭanni kha chu a hma mah mah niin a lo sawi tawh.

Hearn chuan, "Fight a duh tak tak a nih chuan hun a pe tur a ni," tiin a lo sawi tawh a, Joshua pawhin thutlukna chu ama kutah chauh awm a nih loh thu a sawi.

Joshua chuan, "Legal team-ten an en mek a, ka kutah engmah a awm lo - hei vang hian alawm dan hremite kan rawih ṭhin. Boxing thawnthu chu in hre sa vek a, dan thil reng reng tihfuh loh a thiang lo.

"Chuvang chuan management leh dan hremi ṭha tak tak kawl a ngai reng a ni. Contract ka ziak ngei dawn a, ka ukilte nghah ve deuh an ngai tih mai chauh a ni," a ti.

Hetihlai hian Fury chuan December 3-ah Joshua awm lo mah se fight hrim hrim a hmachhawn ngei tur thu a sawi a, hetihrual hian Joshua nena an inhnek ṭhulh a ngai anga a sawi hi, boruak siam a tumna pakhat a ni ve thei bawk.

Joshua hian thla hmasa khan WBA (Super), WBO leh IBF title a hlohna Oleksandr Usyk chu hmachhawn nawnin, a tlawm leh a, a title hloh tawh a la kir thei lo.

Kum 35 mi Usyk hian inhnek a chawlhsan hmain vawi thum tal fight hmachhawn leh a la duh thu a sawi a, Fury nen boxing khawvela title lian pali inchuha inhnek chu a ruahmannaah a tel thu a sawi.

Mahse, Pathianni khan Joe Joyce chuan Joseph Parker chu round 11-naah a knockout a, WBO danah chuan Parker hnehtu Joyce hi Fury tan mandatory challenger a ni.