Aizawl FC lakah Chanmari an mualpho

I League club Aizawl FC-in Mizoram Police an hneh loh hnuah insiamṭha nghalin nimin khan Chanmari FC chu 4-0 in an sawp. Zote Honda MPL9-ah Aizawl FC-in point 12 hmuin hmahruaitu an ni a, Chanmari FC an hneh hi tun season-a Standly Rosario hnuaia hnehna an chan hmasak ber a ni.

RG Stadium-a inkhelah Aizawl FC-in inkhel an thunun a, R. Ramdinthara'n (Tharpuia) hun chanve hma lama goal hmahruai a khung hnuah second half-ah R. Lalthanmawia'n (Amawia) goal hnih khungin K. Lalrinfela'n (Mafela) goal khat a khung ve bawk.

Tharpuia leh goal
Chanmari FC-in FC Venghnuai lakah an chetsualna siam ṭhat tumin tlarhnung dinglamah tawnhriat nei ṭha Lalramchullova an dah a, an buaina erawh a kian phah lo.

Minute 29-naah Aizawl FC midfielder Mafela ball pek luh chu Tharpuia'n box chhungah um lutin petna tur khawp hmunruak a insiam hnuah chiang takin a pet goal. Champhai forward Tharpuia vengtu Chullova'n hmun awl a pe hnem mah mah a tih theih.

Goal hmahruai khungtu Tharpuia hi Inter Village 2022-a top scorer kha a ni a, Chanmari FC lakah MPL9-a goal vawi khat a khungna a ni. Chanmari FC-in Lalhmunmawia (Amawia) hmangin siphurh sutna nei mah se AFC keeper zawnah a pet a, I League club midfielder Lalramsanga pawhin a hun ṭha neih chu goalkeeper zawnah tho a pet ve bawk.

Amawia Show
Second half-ah Chanmari an insiam ṭha lo a, defender Malsawmtluanga Hrahsel tih ṭhat tawk loh vangin Amawia'n minute 48-naah a khung belh. I League club-in goal hnihna an khung hma avangin Chanmari tha thona a reh a tih theih a, Amawia hian goal thumna khungah inngai mah se offside vangin pawm a ni lo.

Minute 67-naah Amawia'n ṭha takin a lalut a, a ball pass ṭha chu Mafela'n chiang takin a pet goal. Goal thum luh hnuah Chanmari beisei a bo a, chutihrualin Chanmari forward Lalrinchhana'n hnai tak aṭangin keeper zawnah a pet.

Injury time-ah minute nga pek belh a ni a, Chanmari aiin Aizawl FC-in an hmang ṭangkai zawk. Corner flag bulah Chullova'n freekick a chawi a, Amawia'n mawi zetin goal kilah a hlai lut - CFC keeper MS Dawngliana'n dan ngaihna a hre lo.

Engtin zel?
Chanmari FC-in insiamṭhat an mamawh a, an insiamṭhat ran loh chuan semifinal khelh phak loh a hlauhawm dawn. MPL club zinga sum seng hnem pawla ngaih Chanmari hi an result leh an khelh danah an lawm kher lo ang.

CFC coach Rochhingpuia chuan, "Kan insiamṭhat vat loh chuan hmalam hun a êng lo khawp mai," tiin inkhelh banah a sawi. Chanmari hian Mizoram Police an hmachhawn lehnghal dawn a, fixture a hautak dawn. Chutihrualin Lammual generator a la ṭhat loh chuan round 6 khelh hun hi sawn theih a ni a, Chanmari tan inkhelh hun sawn hi a thlanawm zawk hial ang.

Aizawl FC coach Standly Rozario chuan, "Ka naute khelh danah ka lungawi. Under 18 player khelhtir ngei ngei a ṭul hi club tan a harsatna chin pawh a awm ang, chutihrualin Mizoram foobtall tan chuan a ṭha a ni," tiin a sawi thung.