Ghana tana inlan Inaki a inchhuang

Athletic Bilbao forward Inaki Williams chuan Ghana tana a inlan thei chu lawmawm a tih thu a sawi a, Black Stars (Ghana sawina) tana match tam zawk inlan a beisei thu a sawi bawk - Ghana fans tan rimawi a tling ang.

Kum 28 mi Inaki hi a nu leh pa chu Ghanaian an ni a, mahse, Bilbao-ah a piang a, Spain mi leh sa a nih avangin age level-ah Spain tan inlanin, senior team tan match khat a khel hman bawk.

Mahse, July 5, 2022 khan Inaki hian Ghana tana inlan a duh thu a sawi a, tun international break-ah koh nghal niin, Brazil an hmachhawn. Inaki hian bench aṭanga lutin Ghana tana a match hmasa ber a khel a, mahse, 3-0 in an tlawm.

Williams chuan, "Ka ram tana ka match hmasa ber ka ṭhiante nena kan khel thei hi ka lawm hle. Ghana tan inlan a, tha ka thawh ve thei hi ka lawm a, staff leh squad te min puihna zawng zawngah lawmthu ka hrilh a ni.

"World Cup atan theihtawp kan chhuah zui ang a, nuam ti taka ka khelh zel theih ka beisei. Match tam zawk khelh a, Black Stars hlawhtlin nana ka puih zel theih ka beisei," a ti.

Athletic Bilbao tan match 346-a goal 77 leh assist 49 nei thei Inaki hian Euro 2016 khelh dawn hnaihah khan Spain tan friendly match a khel a, 3-1 a Bosnia & Herzegovina hnehin, Euro 2016 atana Spain squad-a standby player 11 zingah a tel.

Inaki chuan, "Min lawmluh zan khan hlim taka lamin ka zai a, player-ten min thlawpin, min lo lawm em em a, engkim mai hi nuam ka ti em em vek a ni," a ti.

Kum 2016-a Spain tana a inlan lai khan khatihlaia Ghana scout, Indian Super League club NorthEast United coach pawh lo ni tawh Gerard Nus chuan Inaki inkhel a en a, Ghanaian national team chuan Inaki hi an ram tana inlan turin an duh.

Mahse, Spain tana inlan chhunzawm tura beiseina sang tak nei, Inaki chuan, "Ka nu leh pa te chu Accra (Ghana khawpui) mi an ni a, kan zin pawhin nuam ka ti ṭhin hle. Mahse, kei chu Accra-ah piangin ka seilian ve lo a, ka culture chu Spain a ni a, player dang, kei aia Ghana tana inlan ngaihlu zawk an awm ang.

"Ghana tana khelh phu tak, 100% a Ghana thinlung pu thei aia an ram tana ka lo khelh chu a dik thei lo ang," a ti a, Ghana a hnarnaah an ngai - mahse, a beisei angin Spain tan a inlan zui lo a, tunah chuan a thawnthu pawh a danglam ta.

Inaki-a'n Ghana tana a match hmasa ber a khelh lai hian, a nau Nico Williams chu tun international break-ah Spain squad-ah a vawi khat nan koh a ni ve bawk a, Switzerland lakah bench aṭanga lutin a match hmasa ber a khel tawh a ni. Mahse, 2-1 in an tlawm thung.