October 29-ah I League khel dawn

All India Football Federation (AIFF) League Committee chu nimin khan Football House, New Delhi-ah an ṭhukhawm a, Lalnghinglova Hmar (Tetea Hmar) kaihhruai committee chuan October 29 aṭanga I League khelh ṭan turin an rel.

League Committee chairman Lalnghinglova Hmar chuan, "Tualchhung football a kal dik phawt chuan ram chhung football-in hma a sawn mai, tih a ni ṭhin. Kan hna ber chu a kalphung pangngai anga league buatsaih ngawt a ni lo a, Indian football hmasawnna tura kan thawh a ngai. Senior aṭanga junior league thlengin, AIFF kaihhruaina hnuaiah nasa taka hmasawn kan beisei a ni," a ti.

MFA honorary secretary kaihhruai committee hian thutlukna lian tak tak an siam nual a, chung zingah chuan I League-a ram pawn player squad-a awm thei zat tihpun a tel. Season hmasa ang thoin 5+1 foreign player an awm thei a, panga hi eng ram mi pawh an ni thei a, pakhat erawh Asian mi an nih a ngai. Mahse, season hmasaa 3+1 chiah squad-a awm thei chu tidanglamin, an vai hian squad-ah an awm zel thei tawh dawn.

Chutihrual chuan foreign player paruk hi khelmualah a ruala an awm a rem dawn lo - pali (3+1) chiah khelmualah a ruala an awm a rem dawn a, Asian quota bika khel player chu lakchhuah a nih dawn chuan Asian mi tho a nih loh chuan Indian player ngeiin an thlak tur a ni a, Asia khawmualpui pawn lam player tan thlak theih a ni lo ang. Asian mi ni lo erawh foreign player emaw Indian player hmangin thlak vek theih an ni.

Thutlukna langsar zingah Second Division League-ah ram pawn player chhawr phal a ni dawn lo - team 15 an inel ang a, ISL leh I League club reserve team-ten inelna an hmachhawn phalsak niin, final round chu home & away-a khelh tur a ni ang.

AIFF League Committee chuan Executive Committee a thlen turin, state hrang hrang league-a ram pawn player chhawr phal loh an rel bawk a, season tharah I League aṭanga second division-a team pahnih relegate turin an ti a, second division aṭangin team pahnih an kaisang thei ang.

Indian Women’s League chu hmun khatah ni lo, hmun hrang hranga khelh turin ruahmanna siam a ni a, IWL, Second Division leh Academy tana licensing criteria pawh ennawn turin EC-ah thlen a ni dawn.

AIFF League Committee ṭhutkhawmah hian AIFF secretary general Dr. Shaji Prabhakaran, deputy secretary general Mr. Sunando Dhar, League Committee member Amit Chaudhary (Tripura), Dr. Reginold Vargese (Kerala), KP Singh (Chandigarh), Kiran Chowgule (Maharashtra), M Satyanarayan (Karnataka) leh Nizamuddin (Lakshadweep) te an tel bawk.