Chhingcows leh Chawnpui an inthlau lo

Zote Honda MPL9-ah Chhinga Vengin hneh loh an la nei lo a, Chawnpui FC erawh vawi hnih ngawt an tlawm tawh. Chhingcows leh Chawnpui hi vawiin chhun dar 12:00 hian RG Stadium-ah an inkhel ang.

An chak loh zat thlir chuan team pahnih hi an inthlauh hmel a, mahse Chhingcows hian chak an harsat ve tho avangin team pahnih inthlauhna hi point hnih chauh a ni. Lalsangzuala Hmar hote hian hnehna an chang thei a nih chuan Chhinga Veng hi an zuan khum thei ang.

Chawnpui hian match li an khelh tawh aṭangin point an hlawh chhuak a, goal li an khung tawh bawk. Amaherawhchu Mizoram defender ṭha Lalrinchhana Tochhawng telna Chawnpui team hian goal ruk an chhuah tawh a, an tlarhnung a phui tawk lo. Bethlehem an hneh loh ṭum pawhin anmahni ṭantuten an lungawi lohna an lantir hial.

Chawnpui hian semifinal khelh an tum a nih chuan an elpui zinga mi Chhinga Veng hi an hneh a ṭul dawn a, coach Sanga leh a hote 'pressure' hnuaia an khelh a ṭul dawn. Chutiang bawkin Chhingcows pawhin pressure an nei.

Chhinga Veng hian vawi thum cleansheet tawh mah se goal thum chauh an la khung a, goal khung an harsat tih phat rual a ni lo. Chhingcows hian chak loh la nei lo mah se vawi khat chauh an la chak a, vawi thum lai an inhnehtawk - goal an khung theih loh vang a ni.

Chhingcows coach Anand Gurung chuan, "Goal kan khung tawh ngei kan beisei. Kan training dan pawh kan thlak hret a, finishing kan zir nasa. Kan khingpui tur Chawnpui hi coach ṭha enkawl an ni a, fimkhur takin kan khel ang. Chutihrualin chak ngei erawh kan tum e," tiin Vanglaini a hrilh.