F1 thleng tur Singapore an phur

Hripui len hnua a vawi khat nan Asia khawmualpuiah Formula 1 intlansiak a awm leh dawn. Inelna thleng tur Singapore chuan zana intlansiak a nih dawn avangin infiamna bakah hlimhlawp bawlna hrang hrang nena hman an tum.

Mipui 90,000 tan ticket siam a ni a, an hralh zo vek tawh. Marina Bay Street Circuit-ah mipui an khat tlat dawn tihna a ni a, zan boruak a nih avangin a boruak a nung leh vet vet hle ang - F1 inelna dang chu chhun emaw tlaiah emaw tlan a ni ṭhin.

F1 champion lai Max Verstappen chuan a nomawi kawl lai humhim theihna remchang a nei dawn, chutihrualin amah a chetṭhat bakah a elpuite chet fuh tawk loh a ngai tel - champion theihna awm mah se, kawng a la thui kual deuh.

Champion hmuh châk vang ngawr ngawrin Singapore khawpui hi an phur a ni lo, hun rei tak Covid-19 vangin an inkharkhip a, tun hnaiah khawvel huapa punkhawmna an hmang leh thei ta chu an hlim a ni.

Singapore Tourism Board (STB) executive director Ong Ling Lee chuan, "Infiamna khawmpui lian kan thleng leh thei ta, hei hian khawvel hmuhah Singapore chuan mikhual a thleng leh thei ta e, tih a entir.

"Kan rama khualzin lut duhte tan kawng zau takin kan hawng tawh," tiin a sawi a, an ram sum hmuhna langsar tak pakhat chu khualzin an ngah hi a ni ṭhin, an tan chuan mikhual neih hi chanchin ṭha a ni.

Singapore hian hripui leng vanga inkhuahkhirhna hrang hrang chu an hlip kim deuh vek tawh. Bus leh metro chuangte tan erawh hmai tuamna (mask) vuah a la ngai thung, inkhunghran leh chhuah phal lohna dan a awm tawh lo.