Faroe Islands laka tlawm Turkey-in coach an chhan

Turkish Football Federation chuan Pathianni zan khan, Nations League inkhelah Faroe Islands ngam lo mah se, coach Stefan Kuntz an thlawp thu an sawi a, German coach tan thu hriat nuam tak a ni ngei ang.

Faroe Islands hi FIFA ranking-ah 125-na an ni mek a, Turkey hi 43-na ni mekin, 82-in an inthlau tihna a ni - mahse, Pathianni zan khan Faroe Islands hian 2-1 in hnehna an chang! India ranking chu 104-na a ni a, Blue Tigers ai pawhin Faroe Islands hi hmun 21-in an hniam zawk tihna a ni.

Turkish Football Federation board member Hamit Altintop chuan, "Coach thar hnuaiah kan inthlak danglam a, June thla khan kan hmasawnna chu hmuh theihin pholan a ni. Kan match hnuhnung pahnih avangin ngaihtuahna chu kan seng ngei a, kan hnungtawlh a ni. Mahse, coach erawh ka thlawp tlat," a ti.

Player a nih laia Germany tana vawi 25 inlan thei Kuntz hian September 19, 2021 khan Turkey hi a enkawl ṭan a, match 12-ah vawi sarih hnehna chanpuiin, vawi hnih draw an nei a, vawi thum an tlawm.

Mahse, Nations League-a League C-a awm ram hian tun international break-ah match hnih khelin an chak zo lo ve ve a, Luxembourg chu 3-3 a an inhnehtawkpui hnuin Faroe Islands an ngam lo a, fans tan chuan a tlawm thlak takzet.

Faroe Islands-ah hian mipui 49,000 aia tlem an awm a, Turkish infiamna chanchinbu lar Fanatik chuan, "Faroe Islands-ah hian mipui aiin kel an tam zawk a, len leh tet hian dinhmun a hril lo," tiin an ziak hial!

Turkey forward Serdar Gurler chuan, "Hrehawm kan ti takzet a, chhuanlam tur a awm lo. Annin chak an duh ang em khan chak duhin kan tuihal ve lo a, kan bei lo a ni," tiin a sawi.

Faroe Islands tana goal khungtu pahnihah Viljormur Davidsen chu Swedish top division club Helsingborgs IF tana khel a ni a, Joan Simun Edmundsson chu Belgian second division club S.K. Beveren tana khel a ni thung.

Turkey hian Nations League-a an match hnuhnung pahnihah hnehna chang lo mah se, point 13 hmuin League B an inhlangkai tho a, Faroe Islands erawh League C an la khel zel ang.