A hmun ngaiah Swiatek

Season tir lama Ashleigh Barty-i'n tennis a chawlhsan khan, kha tih laia world number 2 Iga Swiatek chu world number 1 a hlankai a ni. Polish nula hi engtiang chena rei nge number a nih theih ang, tih chu zawhna a ni a, a chhanna chu - a sang ber a nih aṭangin a la tlahniam leh lo.

Swiatek hian kuminah French Open leh US Open nomawi a chawi. April 1 aṭang khan fal takin world number 1 a la nih chhunzawm char char, tunah hian amah hnaih bertu Ons Jabeur aiin a point hmuh chu a let thawkin a tam.

A chesual viau a nih loh chuan Swiatek hian elphaktu a nei mai dawn lo niin a lang. WTA Finals khelh hmabak an la nei a, season tharah pawh a ranking point neihsa umphak tur chuan player dang tan chet ṭhat a ngai khawp ang.

Hmeichhe tennis thuneitu sang Women's Tennis Association (WAT)-in ranking an tihchhuah tharah hian, Ekaterian Alexandrova chu a sang zual 20 zingah tel phak lo mah se 21-na a ni a, tennis a khelh hun chhunga a ranking san ber ṭum a tawng.