World Cup khel lo tur Italy an insiamṭha

European champion Italy-in November-a khelh ṭan tur World Cup an khel phak lo a, mahse, Azzurri hian UEFA Nations League-ah an insiamṭha nghal tih pholangin Nations League finals an lut.

Italy hian Thawhṭanni zan khan Hungary chu 2-0 in an hneh a, League A group 3-ah anni aia sang zawk awm loin, nakkuma khelh tur Nations League-ah finals an lut.

Mahni muala khel Hungary hian finals lut turin draw result an mamawh a, mahni muala khel tur an nih bawk avangin an dinhmun a ṭha hle.

Mahse, chak ngei ngei mamawh Italy an chungnung zawk a, Giacomo Raspadori leh Federico Dimarco ten goal khat ve ve khungin, Hungary lamin a chhanletna tur an nei lo.

Italy an chungnung
Puskas Arena-a inkhelah Hungary tan finals lut turin draw result neih a tawk a, hemi hrechiangtu coach Marco Rossi chuan 3-4-2-1 formation a rawn hmang a, Italy lakah counter attacking football chu innghah nan hman a tum.

He 3-4-2-1 formation hi hman thiam chuan tlarhnung venhim theih tak a ni - full back pahnihin winger an veng thei a, centre back pathumin number 9 leh number 10 lo vengin, khingpui goal nawr na tak tur chu ven theih a ni.

Mahse, Hungary-in an formation hman an chhawr lo - Italy lam ball cross satliah, goalkeeper Péter Gulacsi-a'n a man ngheh loh chu defender Attila Szalai-a'n goal line aṭangin a pet chhuak hman.

Mahse, Hungary an insiamṭha hleithei lo. Minute 27-naah defence lama Hungary player-te ball inpe kual chu an chesual a, Ádám Nagy-a'n keeper Gulácsi a pek chu Italy striker, kum 18 mi Wilfried Gnonto chuan a nangching - a per lehlam chu Raspadori chuan tun international break-a a goal hnihna ni turin a khung.

A la tawk lo
Italy-in first half-ah Giovanni Di Lorenzo hmangin goal khung belh theihna remchang nei mah se an chhawr lo a, Hungary tana Szalai goal khung ngei tura ngaih Italy goalkeeper Gianluigi Donnarumma-a'n a dan hman pawh uiawm tak a ni.

Goal dang lut loin chawlhlawk hman a ni a, second half-ah Hungary-in bul an ṭan ṭha zawk - Loic Nego-a shot chu Donnarumma-a'n a dan hnuah a per lehlam chu Dominik Szoboszlai chuan shot lehnghal mah se dan per a ni a, a la tawp lo cheu.

Hungary tan Callum Styles chuan box pawn aṭangin ball per hi a shot a, mahse, a birthday emaw tih mai turin Donnarumma bawkin a dang nawn - hnai set sawtah heta ṭanga a per hi Ádám Szalai chuan pet ve leh mah se a la goal chuang lo!

Italy an thiam a, chep tak karah pawh ball an inpek kual zel theih avangin minute 52-naah an goal hnihna an khung ta nge nge a, AS Roma midfielder Bryan Cristante siamsak ṭha zet chu Dimarco chuan hnai set sawt aṭangin goal-ah a chantir.

Italy an vannei
Inkhel pumpui thlirin Italy-in chak an phu tih a lang a, chutihrual chuan Hungary chance neihte thlirin Azzurri hi an vannei tia sawi ve theih tho a ni - goal khungna chance an nei nual.

Nego ball cross, Millwall midfielder Styles-a'n hnai set sawt aṭanga a tauh Donnarumma-a'n a lo dante chu keeper ṭha mi lo tan chuan ven hman chi a ni lo a, Paris Saint-Germain keeper Donnarumma-a'n fak a phu.

Italy hian Dimarco leh Gianluca Scamacca hmangin chance an nei ve leh tho bawk a, mahse, goal dang lut tawh loin team pahnih inkhel a tawp - chak mamawh Italy an chak a, Nations League finals khel turin an tling.

Azzurri bakah hian Netherlands leh Croatia chu finals an tling tawh bawk a, nizan khan Portugal leh Spain inkhelin, an result kan hre hman lo - Portugal hian point khat an hmuh chuan finals an lut dawn a, Spaine erawh chak mamawh an ni thung.