Electric nge êng zawk dawn Bethlehem?

Zote Honda MPL9 round 4 khelh zawh takah Electric Vengin point an hmu ta a, FC Bethlehemin chak hmel an hmu ta bawk. Vawiin tlai dar 3:00 hian team pahnih hi RG Stadium-ah an inkhel dawn a, team intiattawk an nih avangin match pawimawh bik a ni ang.

Victor Lalbiakmawia enkawl Bethlehem hi round 4 thleng khan goal khung tam ber an ni a, goal chhuah tam ber an ni bawk. MPL kai thar inkhelah goal a luh tam ṭhin avangin inkhel a hmuhnawm ṭhin a, Electric Veng nen pawh hian an hmuhnawm ngei beisei a ni.

Bethlehem hian inelna ṭantirh lamah player dam kim lo an ngah a, tunah erawh coach pawhin a duh dan milin player a luhtir theih tawh. FCB coach Victor chuan, "Kan dam kim chho a, kan khel ṭha tulh tulh ang. Kan khingpui tur Electric Veng hi an point hmuh aṭanga teh chi an ni lo. Police, AFC leh Chanmari lakah goal khat vekin an vanduai a, Chhinga Veng nen an inhnehtawk. Team ṭha tak a ni a, chak ngei erawh kan tum dawn," tiin Vanglaini a hrilh.

Electric Veng coach Vanlalsawma Colney chuan, "Tetea leh Sangkima te an inhliam a, squad a pan sa nen a pawi khawp mai. Mahse, kan khingpui tur Bethlehem hi MPL club zinga a ṭha pawla kan dah kha chu an ni lo a, point hmuh leh ngei kan tum," tiin a sawi ve bawk.