Mizoram Super League season 7-ah zanin dar 8:00 hian Khatla TBL leh Chawnpui BC te an inkhel dawn a, Levi Bradley 'show' hmuh tur a awm leh ang.
Mizoram chhunga basketball inelna sang ber MSL inkhel hi Zonet kaltlangin Rihnim leh Empai-ah a en theih a, basketball ngaina tak tak chuan a hmun ngeia en a man hla thung.
Levi chu
Khatla TBL-in an match hmasa berah MSL6 final-a an hneh loh Zarkawt BCA an hmachhawn a, champion lai hian feet ruk leh inches riata sang Joseph Fredrick Allen bakah Mizo tlangval feet ruk leh inches ngaa sang Matthew Remtluanga Sailo an kawl.
BCA tlarhnung ṭha karah Khatla TBL foreigner Levi Bradley a langsar. Wisconsin, United States aṭanga chah chhuah Bradley hian hmuhnawm a keng tel a, a chevel hi a entlak hle.
Zarkawt club lakah Levi hian chiang takin a dunk a, point 29 neiin rebounds pawh vawi ruk a la. TBL hian Levi hahchawlh laia lut turin Arvindar Singh an la nei bawk a, ani pawh hi feet ruk leh inches riata sang a ni. Mizo hlanga khel tur Chawnpui tan buaina tham a tling ang.
Mizo Vs Mizo
Chawnpui hian an match hmasa berah Tuikual South an hneh lo a, amaherawhchu an khelh dan thlirin vannei thei tur an ni. Mizo hlanga khel chungin court chhungah huaisen takin an khel a, foreigner hmaah an zam lo.
Chawnpui player pathum Laltlanhlua (16 pts, 4 reb), Lallianmawia (15 pts, 3 reb) leh Zodina Chawngthu (14 pts, 8 reb, 2 asst) te an khel ṭha a, Khatla TBL lakah pawh team innghahna tur an ni ang.
Khatla TBL lamin theihna nei sang K. Lalthianghlima (10 pts), Vanlalrinchhana (14 pts) leh Rinmuanpuia Chhangte (11 pts) te an nei ve bawk a, Chawnpui lakah an theihna lantir ngei an tum tawh dawn a ni.
40% chance
Chawnpui coach Samuel Zodinpuia chuan, "Danglamna chu foreigner an ni a, an len bik avang te leh tawnhriat an neih ṭhat avangin danglamna an ni ṭhin. TBL nen pawh hian foreigner-te hi danglamna an ni thei a, chutihrualin 40% chu chakna chance kan nei vein ka hria," tiin Vanglaini a hrilh.
Samuel-a chuan chhunzawmin, "Ka naute an thawkrim a, training kan neih ṭhat avangin inrintawkna pawh an nei nghah. Chak ngei tumin TBL kan hmachhawn ang," tiin a sawi.
Khatla TBL coach Vanlalnunsanga (Lana) chuan, "Match hmasa ber kan khelh zawhah hahdamna hun leh training-na hun kan nei a, a hma aiin kan ṭhat sawt theih kan beisei. Kan tihsual leh insiamṭhat ngai laite kan sawi ho a, a bik takin Levi aṭangin thil thar kan hriat belh hnem hle," tiin a hma aia an ṭhat thu a sawi.
Lana chuan sawi chhunawmin, "Chawnpui hi foreinger an neih loh avanga zuam ngawt a rem lo a, chetsual theihna an ni. Fimkhur takin chak ngei tumin kan khel ang," tiin Vanglaini a hrilh.
Zanin Inkhel Tur
Chawnpui 8:00 PM Khatla TBL
–––––––––––––––––––––––––––––––––––––––––––––––––––––––––
June 14, Thawhlehni
Tuikual South 8:00 PM Zarkawt BCA
–––––––––––––––––––––––––––––––––––––––––––––––––––––––––
June 16, Ningani
Chawnpui 8:00 PM Chanmari Vikings
–––––––––––––––––––––––––––––––––––––––––––––––––––––––––
June 17, Zirtawpni
Khatla TBL 8:00 PM MSV Hotshots
–––––––––––––––––––––––––––––––––––––––––––––––––––––––––
June 18, Inrinni
Chanmari Vikings 8:00 PM Tuikual South
