Mizoramin semifinal an lut

Khelo India Youth Games 2022 mipa football-ah Mizoram chuan nimin khan Goa chu 3-0 in an hneh a, group match hmasa berah Kerala 5-0 a an hneh tawh bawk avangin semifinal an lut.

Panjab University Ground 1-a inkhelah champion lai Mizoramin first half-ah goal khung thei lo mah se second half-ah Zonunmawia goal hmahruai a khung hnuah T. Malsawmzuala goal hnih a khung.

Nimin group A inkhel dangah Kerala leh Punjab te 1-1 in an inhnehtawk a, Mizoram hi group hmahruaitu an ni chiang tawh. June 9, Ningani hian group match hnuhnung berah Mizoram hian Punjab an hmachhawn ang.

Semifinal aṭangin Tau Devi Lal Stadium, Panchkula, Haryana-ah khelh a ni ang a, Mizoram hi June 11, Inrinni chawhma dar 9:00-ah an inkhel ang. Mizoram khingpui tur hi group B pahnihna an ni dawn a, he group-ah hian Meghalaya, West Bengal, Karnataka leh Haryana te an awm.

Mizoram manager R. Lalthawmmawia chuan, "Kerala ang thoin Goa-in goal venhim an tum a, first half-ah goal kan khung thei lo. Second half-ah erawh kan phu angin goal thum kan khung a, hei aia tam pawh khung thei tur a ni. Kan khelh danah kan lungawi a, semifinal kan thlen avangin kan lawm," tiin Vanglaini a hrilh. Mizoram team hi SYS coach Mamawia leh Lalbulliana ten an enkawl a ni.