Lewy-a'n Bayern chhuahsan a duh

Bayern Munich striker Robert Lewandowski chuan a dinhmun tichiangin, "Keimah hian eng emaw a thi," tiin German club tana khelh châkna a neih tawh loh thu a sawi.

Lewy hian Bavarians tan kum khat chauh contract a nei tawh a, Allianz Arena chhuahsana Nou Camp pan a duh. Polish striker chuan, "Bayern hi chhuahsan ka duh. Rinawmna leh inzahtawnna hi a pawimawh a, a ṭha ber chu inremna neih theih a ni," tiin a sawi.

Bayern hian Lewy thlakna tur a hmu lo a nih chuan chelh an duh a, Liverpool forward Sadio Mane nen sawizawm ni mah se Polish striker chelh erawh an duh ber a la ni tho.

Lewy chuan, "Ka thusawi an ngai thla duh lo a, keimahah hian eng emaw a thi a, hemi sut tlang hi ka tan chuan a harsa tawh ang. Professional ni mah ila ser nung a awm reng tawh ang. Kei chuan Barcelona tih loh chu tumah ka dawr lo a, thuchiang chu Bayern chhuahsan ka duh," tiin a sawi.

Khawthlang media te chuan Lewy leh Barca hian a thuphungin kum thum atan inremna an nei tawh tihin an ziak a, Polish striker pawhin club sulhnu nei ṭha Catalan club hi zawm a duh.

Lewy chuan, "Bayern tana kum tam tak ka hman chhungin inhliam chung leh na nei chungin ka khel fo a, ka theihna zawng zawng ka hlan ṭhin. An tana ṭha tur chauh ngaihtuah loin ka thlirna pawh hi min ngaihtuahsak ve rawh se. Ka thutlukna min zah sak lo a nih chuan player dang pawhin Bayern pan hi an hreh phah ang. Inzahtawnna hi a pawimawh," tiin a ṭawng na hle.

Bayern Munich striker Lewy hian Borussia Dortmund leh Bavarians tan Bundesliga-ah match 383 a khel a, goal 312 a khung. Bundesliga history-ah Lewy hian Gerd Muller (365 goals) chiah a tluk lo a, Bayern-ah hian kum hnih dang chu khum leh se Muller-a record hi a khum ngei ang.