Swiatek-i'n a dinhmun sawhnghet

Iga Swiatek chuan hmeichhe tennis number 1 a nihna a sawhnghet zel. Poland nula hian world ranking point 8631 a khawl khawm tawh a, amah hnaih bertu Anett Kontaveit aiin point 4300 teh meuhin a sang fal ta.

Ashleigh Barty a chawlh vangin April aṭang khan Swiatek hi number 1 a ni, loh theih loh avangin a chung berah a kaisang tihna a ni. Tun hnaiah a zawnin match 35 zet a chak tawh - Barty kha chawl kher lo mah se number 1 ni thei tur a ni ang.

Kum 21 mi Swiatek hian a vawi hnih nan French Open nomawi a chawi fel leh tawh a, tunah chuan Wimbledon khel turin rilru a siam mek. Grass court hi a inkhelh thiamna tak ni lo mah se champion tura rinkai chu a ni dawn tho.

Coco Gauff chu number 13-ah a kaisang, American tleirawl duhawm hian a hmaa player awm 10 tehmeuh a zuan khum. A sang zual 10 zinga tel phak turin kawng dik a zawh mek - French Open final a lut khan nasa takin a ranking a siam ṭha.