Nations League: Croatia leh France an inhnehtawk

UEFA Nations League-in sawi hnawm hlawh ṭhin mah se a tir aṭangin beisei loh result hriat tur a awm chho deuh reng a, ngaihven duh lo lui tan pawh Nations League chanchin a hriat loh theih loh.

Thawhṭanni zan khan Nations League inkhelah champion lai France chuan Croatia an lenchilh a, khualmualah 1-1 result an hlawh chhuak thei hram - France hian match hnih aṭangin point khat chiah an la nei!

France hian minute 52-naah Adrien Rabiot hmangin goal hmahruai khung mah se Andrej Kramaric chuan minute 83-naah penalty hmangin a chhanglet a, hun tawp thlenga goal dang a luh loh avangin team pahnih an inhnehtawk.

Hetihrual hian France tan Karim Benzema leh Kylian Mbappé te an inlan lo a, Antoine Griezmann pawh bench aṭanga luhtir chauh a nih avangin France hi an ṭhat dan berin an inlan lo.

France thar!
Nations League champion lai France hian an match hmasa berah Denmark chu 2-1 in an ngam lo a, France boss Didier Deschamps chuan Denmark laka tlawm team aṭangin player 10 ngawt a thlak danglam!

Denmark laka tlarhmaa inkawp Benzema, Mbappé leh Griezmann te pawh bench-ah an awm ṭhap a, Denmark laka formation 3-4-1-2 pawh 4-2-3-1 hmangin a thlak a, tlarhma berah Wissam Ben Yedder a awm a, a hnung chiahah transfer bazar-a 'hot' tak Christopher Nkunku a awm thung.

Goalkeeper Hugo Lloris meuh pawh lakchhuah a ni a, Tottenham Hotspur keeper aiah hian Serie A lama AC Milan champion puitu Mike Maignan a lut bawk - Deschamps-a'n 'risk' la chungin player a en chhin.

France tan hian Arsenal player pahnih, Marseille-a loan-a khel ve ve Matteo Guendouzi leh William Saliba te chuan competitive match-ah a vawi khat nan bul an ṭan a, Nkunku pawh friendly match tih loha France tana a bul ṭan hmasak ber a ni.

A fuh ṭep...
France-in nasa takin player an siksawi a, mahse, first half-ah goal a lut lo. Second half-ah erawh France-in goal an khung a, minute 52-naah Rabiot chuan AS Monaco striker Ben Yedder siamsak chu goal-ah a chantir - Deschamps-a'n a tifuh dawn niin a lang hman.

Mahse, mualneitu Croatia an zam bik lo - hun tawp nan minute sarih chiah a awm tawh tihah penalty an hlawh chhuak a, Jonathan Clauss-a foul chu video assistant referee hmanga ennawn a nih hnuah referee-in penalty spot a kawk.

Croatia tan Andrej Kramaric a lo pen chhuak a, Hoffenheim striker hian Milan keeper Maignan bumin goal-ah a chantir a, hun tawp thlenga goal dang lut loin team pahnih an inhnehtawk.

Deschamps-a'n 1-0 a hma an hruai laiin bench aṭangin Griezmann a luhtir a, mahse, goal an khung belh lo - Aston Villa player thar, defensive midfielder Boubacar Kamara pawh ram tana a match hmasa ber khel turin bench aṭanga luhtir a ni a, mahse, danglamna a thlen thei bik lo.

Modric = 150
Kum 36 mi ni tawh mah se Luka Modric-a'n ram tana a match 150-na khelin bul a ṭan a, Real Madrid midfielder ṭha mi hian minute 79 thleng a khel a, a tan zan chhinchhiah tlak a ni.

Modric hian ram tan match 150 a khelhah goal 21 a khung thei a, World Cup 2018-ah an ram team chu final a hruai thleng bawk - Croatia tana a hnathawh hi hriat reng a ni tawh dawn.

Mahse, tun Nations League-ah erawh Croatia hi France aiin an ropui bik chuang lo, match hmasa zawkah Austria chu 3-0 ngawta an ngam loh avangin point khat tho an la nei mek.

Croatia hi France lakah hian chak thei an ni a, an vanduai tiin a sawi ve theih bawk - West Ham attacking midfielder Nikola Vlasic hun ṭha neih chu Maignan chuan a dansak a, Red Bull Salzburg midfielder Luka Sucic chuan a hun duhawm a khawhral bawk.

Denmark an chungnung
Thawhlehni zana League A, group 1 inkhel dangah Denmark chuan 2-1 in Austria an hneh a, match hnih an khelhah hnehna an chang ve ve - an group-ah hmahruaitu an ni mek.

Austria tan hian Tottenham Hotspur midfielder Pierre-Emile Hojbjerg chuan goal hmahruai a khung a, mahse, Denmark tlarhnung chetsual zarzoin VfL Wolfsburg midfielder Xaver Schlager chuan si phurh sutna goal a khung.

Team pahnih hi inhnehtawkin an ṭin mai dawn niin a lang hman a, mahse, Denmark an beidawng duh lo - hun tawp nan minute ruk chiah a awm tawh tihah Jens Stryger Larsen chuan mawi zetin chakna goal a khung.

Udinese defender-in chakna goal a khung hma hian team pahnihin khung belhna chance an nei ve ve a, mahse, Denmark midfielder Christian Eriksen leh Austrian forward Marko Arnautovic ten goal post an tih per ve ve.

Current a awm lo!
Austria-in Denmark an mikhualna khelmual, Ernst Happel Stadion-ah European football-a thil thleng khat tak pakhat a thleng a, inkhelh hmain current a awm lo!

Current hi Ernst Happel Stadion-a chauh awm lo a ni lo a, stadium awmna khawpui Vienna khaw pumpuiin he harsatna hi an tawk - minute 90 zet inkhel tihkhawtlai a ngaih phah.

Current awm loh lai hian fan-te chuan an mobile phone light chu chhi engin, stadium en nan an hmang - Austria sokar an mualpho a, inkhelh hnuah an player-te mahni mualah an tlawm zui.

Austria hi Manchester United coach kal chhuak ta Ralf Rangnick enkawl a ni a, German coach enkawlna hnuaia an match hmasa berah 3-0 in Croatia ngam mah se an mualah ngei Denmark an ngam lo.