Anfield-ah Milner a cham dawn

Liverpool vice captain James Milner chuan Anfield-ah kum khat dang cham chhunzawm turin contract thar a ziak a, Reds midfielder hian US leh Premier League club dang aṭangin sawmna hmu mah se Liverpool tana khelh chhunzawm zel a thlang a ni.

Kum 36 mi Milner chuan, "He club-a season khat dang ka cham chhunzawm tur hi ka lawm takzet a, engtiklai mahin he club tana khelh hi thil thleng pangngai ve tur rengah ka ruat ngai lo, " a ti a, Anfield-a a cham chhunzawm tur chu a hlim hle.

Milner hi a kum tam tawh mah se Liverpool tan player pawimawh a la ni reng a, season hman zawh takah khan Reds tan inelna hrang hrangah match 39 a khel a, match 14-ah bul ṭanin assist vawi thum a la nei thei.

English midfielder hian kum 2015 khan Manchester City aṭangin Liverpool hi free transfer-in a zawm a, match 289 inlansakin goal 26 a khung a, assist vawi 44 a nei bawk.

Anfield-a a cham chhungin champion nomawi paruk a chawi tawh a, Premier League, Champions League, FA Cup,League Cup, FIFA Club World Cup leh UEFA Super Cup-ah te a champion pui a ni.

Milner chuan, "He club tan hian tha ka la thawh ve thei a ni tih ka ring tlat a, chumi atan chuan contract thar ziah hi ka tan a hluin a pawimawh em em a ni. Kan coach hi a tumah a chiang em em a, chu chuan contract thar ziak turin min hmin bawk," a ti.

England tan vawi 61 inlana goal khat khungtu Milner hian kar khatah £140,000 a hlawh nia sawi a ni a, Anfield-a cham tur hian nasa takin a hlawh a tihniam - a tihhniamna zat erawh tarlan a ni lem lo.

Liverpool boss Jurgen Klopp chuan, "Milner-a contract thar ziak hian min tilawm takzet a, kan tan chuan thil pawimawh tak a ni. James hi hruaitu ṭha a nihna leh dressing room lama a ṭangkaina avangin fak a hlawh ṭhin a, fak pawh a phu reng a ni.

"Mahse, heng thil avang hian khelmuala a thil tihtheih hi tumahin an en liam tur a ni lo - ṭha takin a la khel reng thei a, keini tan chuan chân mai chi a la ni lo a ni," a ti a, Milner an chelh thei chu a hlim thu a sawi.

Milner hian November 2002 khan kum 16 mi niin Premier League-a a match hmasa ber chu Leeds United tan a khel a, kum 20 chuang English top flight league-ah hun a hmang tawh - a contract thar avangin Reds tan season riat a khel dawn tihna a ni.