MFA Grassroots Football chhunzawm

Mizoram Football Association chuan hripui leng vanga hun rei tak chhung a kalpui theih loh hnuah June 6, Thawhṭanni aṭang khan Lammualah Grassroots Football a kalpui leh ṭan.

A hawn niah hian MFA Grassroots Committee chairman PC Vanlalhruaia chuan thu sawiin, hripui leng avanga kum hnih chuang zet grassroots football kalpui theih a ni lo chu MFA-in pawi a tih thu a sawi a, naupangte chu an football zirna chu nuam ti tak leh ṭha taka kalpui turin a chah.

Grassroots football ṭan leh tur hian nu leh pa aṭangin nasa takin ngenna awm mah se hripui laka naupangte himna chu MFA-in a dah pawimawh avangin chhunzawm theih a ni lawk lo a, 2022 - 2023 season aṭangin chhunzawm a ni leh ta a ni.

Mizoram hi AIFF hnuaia Grassroots Football kalpuina hmasa ber niin kum 2012 khan bul ṭan a ni a, he hmuna zir chhuak India Sub Junior Team-a khel phakte leh professional footballer ni tate pawh an awm tawh a ni.

Grassroots football hi tlai dar 3-4 inkarah Lammualah kalpui a ni dawn a, zawh duh nei tan a hnuaia number-ah hian zawhfiah theih a ni.

9862647664

9862032073

9436376032