French Open champion kha Wimbledon atan a chiang lo!

Rafael Nadal-a'n French Open nomawi a chawi zo chiah a, eng tiangin nge grass court season a hman chhunzawm ang tih chu khawvel hriat châk a ni. Spanish star hian a taksa dinhmun a ṭha a nih phawt chuan Wimbledon khelh a tum.

Mahse, a kephah hliam enkawl a la ngai chhunzawm reng a nih erawh chuan grass court inelna lian ber khelh luih a tum lem lo. Wimbledon hi tun thla ni 27 aṭanga khelh ṭan a ni dawn, inlan tum tan chuan inbuatsaihna neih nghal a ngai tihna a ni.

Nadal dinhmun
Australian Open nomawi a chawi a, chumi hnuah a kephah hliam vangin a buai. French Open khel turin a inbuatsaih a, Italian Open an khelh laiin a ke na hian a tibuai, a inkhelh thiamna ber French Open erawh harsa lutuk loin a khel thei.

Amaherawhchu, tournament zawh hnua a taksa dinhmun a sawi chuan mipui a barakhaih. Nadal chuan, "Kar hnih chhung inelna hautak ka hmachhawn, a nihna takah chuan match ka khelh dawn khan chiu (jection) ka ngai ṭhin.

"Ka ke na ka hriat loh nan doctor-in ruahmanna a siam, inchiu hnuah chuan harsatna ka nei lo," tiin a ke hliam chu 100% a dam a la nih loh thu a sawi a, a hliam hian eng chen nge a awh dawn tih erawh a la hriat loh.

A vanglai pawhin Nadal tan Wimbledon hi hmun ṭha ber a ni ngai lo, chuvangin a kum tam hnuah phei chuan khelh ngei a tum ngai lo. Kum 36 tling hlim a ni a, hliam leh harsatna nei chung chuan a khel lui kher loin a rinawm zawk.

A hma pawhin
Nadal natna hi tun hnaia awm a ni lo, nikum pawh khan a ke phah chunglam ruh na vang hian season a hmang tluan thei lo. Wimbledon leh US Open khel loin a chawl tlang a, season chanve chauh a hmang tihna a ni - a ranking pawh a hniam phah.

Tennis chawlhsan a rilruk hman hial a, mahse Australian Open-ah beisei phak baka ṭhain a khel. Nikum lama a rilru tihnualtu hi a la dam miau loh avangin a hma hun pawh sawi lawk a harsa, a nihna takah chuan French Open atan pawh khan rin kai ber a ni meuh lo.

Nadal chuan, "Inbuatsaihna kha ka nei ṭha tawk lo tih chu zep tur a awm lo. Mahse, Roland Garros hi chu Roland Garros a ni a, ka tana a hlutna hi a sangin ka engkima engkim a ni, chumi vanga hlawhtling thei niin ka inhria.

"Kum 36 mi ka nih thlengin Roland Garros ka khel ang tih hi ka ring phak ngai lo, amaherawhchu chutiang chu a thleng miau si. Chuvangin kan hma hunah eng nge lo thleng dawn tih hi sawi lawk thiam a harsa," tiin a sawi.

Beiseina
Season duhawm a hmang a, tuna a khelh dan thlir chuan Nadal tan Wimbledon title pawh a vawi thum nana lak theih tur a ni ang. Chuvangin season khat chhunga Grand Slam pali kawl theihna kawng a inhawng mek a, theih ni se chuan khelh a hreh lo.

Wimbledon vawi hnih champion tawh Nadal chuan, "Wimbledon champion nih i duh em, tia min zawh chuan, 'Duh tehreng mai,' tiin ka chhang ang che u. Mahse, ka khel dawn em, tih erawh ka la sawi chiang thei lo thung.

"Ka taksa in a tlin a nih a, inkhel tura ka inpeih a nih phawt chuan Wimbledon hi khelh ngei ka duh. Tun hma pawhin hlawhtlinna ka lo chan tawhna hmun a ni a, hetiang inelna lian hi chu ka ngaina in player dangte pawhin khelh an duh ngei ang," a ti.

Wimbledon finalist vawi li ni tawh, tuna All England Lawn Tennis Club board member zinga mi Tim Henman chuan champion tumin Nadal-a'n Wimbledon a khelh ngei a beisei thu a lo sawi ve bawk a, player ropui hi inlan ngei turin an duh.

An mamawh
Wimbledon hi tennis tournament upa ber nia sawi a ni a, kum 1877 aṭanga khelh ṭan tawh kha a ni. Ropui lai leh tlakhniam lai pawh a nei ve ṭhin, tun season bik thlir chuan a ropui lai ber a ni dawn lo tih a chiang viau.

Roger Federer a inlan dawn lo, hliam vangin Alexander Zverev a tel thei dawn lo bawk. Russia leh Ukraine buaina vangin world number 2 Daniil Medvedev leh number 8 Andrey Rublev te an inlan ve a remchang ve dawn lo bawk.

Nadal inlan lo ta se, world number 1 Novak Djokovic bak chu boruak han siam lian thei tur an awm dawn lo. Serbian star Novak lah a khelh ṭhat ber lai a nih loh bakah pawn lam buaina a nei zeuh zeuh a, a huhang nat loh lai tak a ni.

A nihna tak sawi chuan, Wimbledon hian tun season bik thlir chuan Grand Slam dang pathum anga boruak neih len an duh a nih chuan Nadal hi an mamawh. British number 1 hlui pahnih Henman leh Greg Rusedski te chuan inlan turin an beisei thu an sawi chhuak der tawh.

Nadal an fak e!
French Open khelhna hmunpui ber Court Philippe Chatrier tualah Rafael Nadal-a lim (statue) siam a ni tawh, amah ṭantute chuan hei hi an la duhtawk mai lo. Stadium hi Nadal hming chawia vuah ni se an duh.
Australia, US leh France-ah chuan an ram player ropui hming chawiin stadium hming an phuah ṭhin. Nadal erawh Spanish mi a nih avangin France tan a hminga stadium hming thlak ngawt a awlsam lo ang, an tihsak a nih erawh chuan a lawmawm dan a thuah hnih dawn.

Mi tam tak chuan Roland Garros hi vawi 14 an khel phak lo, ani erawh chu vawi 14 a champion si. A sulhnu hi thua sawifiah chi a ni lo. Stadium khawta a lim siam ringawt a tawk lo, stadium hming thlak an rilruk a nih pawhin a mak lo ang."
- Ivan Ljubicic

I thil tih ropui takah ka lawmpui a che. Thawhrimna, inpekna leh beidawn duh lohna rah chhuah a ni. Hetiang hun tawng tur hian hun rei tak chhung rilru leh taksa i hlan a ni,"
- Stefanos Tsitsipas

Kum 36 tlin hnuah Roland Garros title a vawi 14 nan a la a, Grand Slam title 22 teh meuh a nei ta bawk. Hetiang kum tawha a thil tawn hi a ropui takzet zet a ni,"
- Sachin Tendulkar

Rafael Nadal i hlawhtlinnaah kan lawmpui che. Khawvel tennis player ropui berin sulhnu ropui i hnutchhiah lawmpui thei chea kan awm hi kan vannei, 2022 hi number mak danglam tak chu a ni e,"
- Real Madrid
(Nadal hi Real Madrid ṭantu a ni a, Champions League final pawh kha a tuk zana match hnei chungin a en. Spanish club-in Liverpool hnehin a vawi 14 nan Champions League-ah an champion a, Nadal-a'n French Open-ah vawi 14 nan nomawi a chawi leh bawk)