Raducanu a hmanhmawh lem lo

Emma Raducanu chuan coach nghet ruat tura a hmanhmawh loh thu a sawi a, grass court season hmang ṭan tur erawh chuan a ṭha thei ang bera inbuatsaihna neih a duh thu a sawi thung.

British tleirawl hian season hmasa khan khawvel barakhaihin US Open nomawi a chawi, hlawhtlinna chanpuitu coach nen hian a hnu lawkah an inṭhen a, kumin tir lam khan Torben Beltz nen an thawk dun.

German coach nen hian beisei an phak ta lo, April thla khan an thawhdunna an titawp. Coach nghet nei loin French Open pawh kha a khel tihna a ni a, khelmual pawn leh chhungah chanchin ṭha a nei thei rih meuh lo.

Kum 19 mi Raducanu chuan, "Thutlukna siam turin hun ka mamawh. Ka kiangah mi ṭha leh fel tak tak min pui tur an awm reng a, chuvangin coach ruat chu hmanhmawh thlak ka ti hran lo.

"Ka thil tum leh thlen tumah ka chiang a, kum 19 mi chauh niin Grand Slam title ka nei tawh. Season hmasa lama nuam ti leh phur taka tennis ka khelh ang kha ka la khel reng, ka rilru put hmang a la danglam lo," tiin a sawi.

Inrintawkna a la neih thu a sawi a, chutihrualin nikuma tournament a hmachhawn dan leh season kal laia a inkhel chu a inthlau hle. Coach mumal leh ṭha tel loa ding khawchhuak tur chuan a tan a la harsa ang.