
Nipui transfer window hawn hun leh khar hun
2021-22 season chu a zo ta a, player lei leh hralhna hun nipui bazar pawh a inhawng ṭep. Europe club hrang hrangten squad thuam chak dan tur ngaihtuahin rilru an seng tawh a, ṭum dang ang bawkin transfer boruak a ngaihnawm hle.
Hawn hun
Nipui transfer bazar hi Premier League leh EFL club bakah Scotland-a club-te tan June 10, 2022 aṭangin hawn ṭan a ni dawn. Ram dang France, Italy, Germany leh Spain te chu July 1 aṭangin transfer hun a inhawng chauh ang.
Hemi a nih avang hian Premier League champion Manchester City chuan Erling Haaland lalut turin Borussia Dortmund leh player nen inremna nei vek tawh mah se July 1-ah chauh official-in an lalut thei tihna a ni.
Khar hun
England leh Scotland-ah chuan transfer window hi September 1-ah khar a ni dawn a, keini hunah chuan September 2 zing dar 3:30-ah a tawp ang.
Germany leh Spain-ah pawh England angin September 1-ah a tawp ang a, France leh Italy-ah chuan August 31-ah a tawp ang.
Inelna ṭan hun
Kumin kum tawpah World Cup khelh a ni dawn a, Qatar-a inelna neih tur hi November thla aṭanga neih tur a nih avangin Premier League an ṭan hma hret dawn.
Kumin EPL hi August 6-ah khelh ṭan a ni ang a, round 16 chu November 12-13 ah khelh tur niin hemi zawh hian an chawl dawn. Inelna hi World Cup final khelh aṭanga ni riatnaah chhunzawm tur a ni a, Boxing Day (December 26) aṭanga ṭan leh tur a ni.