Pathianni zan dar 12:30 hian Estadio de La Cartuja, Seville-ah European Championship last 16 khelh a ni dawn a, champion rinkai Belgium leh Portugal te an inkhel dawn. Red Devils-in goal khung thei bik striker Romelu Lukaku an kawl a, Portugal-in player ropui Cristiano Ronaldo an kawl ve bawk.

Belgium hi FIFA ranking-ah number 1 an ni mek a, FIFA tehna aṭang chuan khawvela team ṭha ber a ni. Portugal hi Euro C'ship champion lai an ni thung a, kum nga liam ta ai khan a ṭha tawh zawk.

A awlsam
Belgium-in group match hmasa berah an thiampuipa Kevin de Bruyne an chhawr thei lo chungin harsatna an tawk lo a, Romelu Lukaku goal hnih leh Thomas Meunier goal hmangin Russia 3-0 in an sawp.

Denmark nen an inkhelh ṭumah erawh Red Devils an talbuai a, halftime-ah 1-0 in an hnu fual. Second half-ah De Bruyne leh Eden Hazard an lut a, inkhel a danglam vek. Thorgan Hazard leh De Bruyne ten goal an khung a, 2-1 in an chak.

Match hmasa pahniha point thum hmu thei Belgium an tling nghal a, match tawp berah Finland hmachhawnin 2-0 in an chak. Finland keeper Lukas Hradecky-a'n an lamah an tih luh bakah Lukaku-a'n tun inelnaa a goal thumna a khung bawk.

A harsa
Champion rinkai zinga tel Portugal-in match hmasa berah Hungary lakah minute 80 chhungin goal an khung thei lo. Minute 84-naah Raphael Guerreiro hmangin goal hmahruai an khung chauh a, Ronaldo-a'n goal hnih khung belhin 3-0 in an chak. Match hnihnaah Germany lakah an mualpho a, 4-2 in an chak lo.

Ronaldo erawhin Germany lakah goal a khung ve tho a, Diogo Jota-a'n goal khat a khung ve bawk. Last 16 lut turin France lakah point hmuh a ngai a, Ronaldo goal hnih hmangin Les Bleus nen 2-2 in an inhnehtawk a, Portugal-in last 16 an lut hram.

Defence puitu Sanches
Portugal-in match thum lekah goal sarih khung mah se goal nga an chhuah tih hriat tel a ṭha. Premier League-a Manchester City champion puitu Ruben Dias pawhin a ti phui zo lo. Tlarhnung pawp chhanah Dias leh veteran defender Pepe ai mahin mual sira awm Nelson Semedo leh Raphael Guerreiro te mawhpuh theih an ni mah zawk.

Fernando Santos-a'n Covid-19 positive vanga Joao Cancelo an chan avangin Semedo thlakna ṭha a nei lo a, Diogo Dalot erawh chhawr theih turin a awm. Guerreiro thlakna tur erawh Sporting Lisbon left back Nuno Mendes a awm a, kum 21 mi hi a dam ṭha tawh.

Portugal tlarhnung ti khawng tura pawimawh ta ber chu Renato Sanches a ni a, Ligue 1 champion puitu Lille midfielder hi France lakah an khel ṭha takzet.

Goal a pawimawh
Portugal-in Bernardo Silva, Diogo Jota, Bruno Fernandes leh Andre Silva te an kawl a, a tawp khawkah erawh kum 36 mi Ronaldo a la rintlak ber. Manchester United-a player ṭha bik Bruno Fernandes-a'n Portugal-ah a thiamna a chhunzawm lo a, a tel loin an ṭha zawk.

Belgium hmaah erawh Portugal tan player pakhata innghah a rem dawn lo a, team pumpui khelh a ṭul dawn. Red Devils an vanduai a, group hmahruaitu an ni chungin last 16-ah champion lai Portugal an hmachhawn a ṭul a, champion an duh a nih chuan chak a ṭul dawn.

Roberto Martínez-a'n player inhliam vangin match thum an khelh tawhah an ṭhat dan berin player a la thlang lo a, Portugal nen erawh an ṭhat dan berin an lut thei tawh ang. Goal khung turin Lukaku chu chiangsa a ni a, a thlawp turin De Bruyne bakah Hazard te unau an awm a rinawm.

Golden generation
Portugal hi 1989 leh 1991 khan FIFA Youth Championships-ah a zawnin an champion. Rui Costa, Joao Pinto, Paulo Sousa, Costinha, Ricardo Carvalho, Luis Figo leh Fernando Couto te telna team-ah Ronaldo rawn tel ve chiahin kum 2000 chhoa Portugal team kha golden generation (rualkhat ṭha bik) tih an ni.

Golden generation an tihte hian Euro 2000-ah semifinal thlengin Euro 2004-ah final thleng mah se an ramah Greece hneh loin an tla a, nomawi an chawi lo. Euro 2016-ah Portugal hi champion mah se golden generation tiha an sawite an ni tawh lo a, chutihrualin tun ṭuma mite erawh golden generation tiha sawi an awm thung.

Belgium team hi golden generation tih an ni ve bawk. Lukaku, De Bruyne, Eden Hazard, Thibaut Courtois, Jan Vertonghen, Axel Witsel leh Dries Mertens te an awm miau avangin golden generation tih hi an phu. Tun ṭumah hian Vincent Kompany leh Marouane Fellaini te awm tawh lo mah se nomawi an chawi a ṭul.

Red Devils hian 2014 World Cup-ah quarterfinal an thleng a, 2018 World Cup-ah pathumna niin Euro 2016-ah quarterfinal-ah an tla. Golden Generation tih ve meuh tan chuan an thlen chin hi inchhuanna tham a tling lo.